In principi al sarà stât un sorenon riferît al inset. Si lu cjate a Darzin, Voleson, Udin, San Lurinç Lisuntin, San Denêl. Viodi ancje Grilli / Grillo.

Al è une vore probabil che chest cognon al sedi la trasformazion di un sorenon, gardel, prin dât a une persone e po deventât un tiermin riferît ae famee. Il passaç di Gardel / Gardello a Gridel al è cetant documentât intes regjistrazions parochiâls di Damâr. No presintis intai prins regjistris canonics, oriundis di Mueç tor la fin dal 1600 o i prins dal 1700, chês stessis personis a son regjistradis tal libri dai batisims, dai matrimonis e dai muarts sedi come Gardello, o Gardel e tal ultin, in maniere definitive, come Gridel. Al è clâr che cui che al regjistrave nol leve daûr di une regule, ma daûr di chel che al sucedeve tal fevelât di ogni dì o di chel che al diseve di se l'interessât o i parincj par lui. Chest al compuartave incongruencis, salts indenant o indaûr tal ûs fin che si è rivâts ae forme standard moderne. Di altris bandis, par esempli a Paulâr, i Gardel / Gardelli / Sgardello a son restâts salts su la forme antighe. Il probleme al è stât dome par nô (di Damâr, NdA) che o vin vût di decidi di stabilizâ il cognon, che se di no al varès tindût a mudâ dal batisim al matrimoni ae muart. In dì di vuê i Gridel a son presints massime a Damâr, a Enemonç e a Plasencis (Merêt di Tombe), là che i Gardel, Gardelli, Gardellini… a son sparniçâts in altris 30 zonis dal Friûl: al è une vore probabil duncje che la evoluzion dal cognon e sedi une cuistion dome di Damâr, o almancul cjargnele (Moroldo, 1999).

Diminutîf di Grigolo, variante di Gregorio. Presint a Pordenon.

Di Grigolo, variante di Gregorio. La l e je dople par ipercoretisim. Al è presint a Tierç di Aquilee.

Cognon di Grau di un sorenon de famee Vallon documentât ae fin dal 1500, cuant che un Gregorio Vallon al è dit Gregolon, ven a stâi “grant Gregori" (Scaramuzza, 2001). Tal 1306 olim Odorlici Grigolonis de Laçaco (Corgnali).

Di grillo, il famôs inset cjantarin. Intal Schedari Corgnali: 1299 in terra Johannis Grilgi (o Griligio) a Glemone; 1341 Maynardo dicto Grillo de Racolana; 1344 Girardo Grili di Vico di For Disore; 1347 Iacunissij Grilon a Muimans; 1397 Dominico q. Grigli a Puart; 1409 terrenum Grigli de Pracluso a Udin; 1413 iuxta Grigliotum a Racolana; 1481 Leonardo dicti Grigyussio de Campolongo; 1504 Blasio Grigli de Monasteto; 1299 in terra Johannis Grilgi (o Griligio) a Glemone; 1540 de Grigl (n. di fameis) a Roncjis di Faedis; 1548 Jacominus Stephani Griglinos a Bagnaria. Tal 1465 Madalena uxor Laurentii Gril de Moiimaco; nel 1467 Ioannes filius dicti Laurentii Grilli et filius dicte Madalene (Ziani, 1999). La forme Grilli si le cjate a Gurize; Grillo a Udin, Codroip, Vildiflum, Tarcint (carateristiche di Cuelalt), Daçan, Sacîl, Pordenon, Monfalcon, Staranzan, Basilian, Cjasteons di Strade (culì al è rivât di Dimpeç cun mistro Vittor Gri de Cargna te prime metât dal Sîscent), Savogne dal Lusinç.

Al podarès someâ al sloven grilc (pron. grilz) “verzelin", non di un ucielut simpatic. Al è presint a Cjampfuarmit e a Bertiûl. Tal 1889 Matthaus e Johann Grilc abitanti in Kranjska Gora SL (Černe, 1992).

Di Grimaldo, non di persone di origjin gjermaniche. Presint a Udin. Tal 1321 q. Petri Grimaldi de Premaryaco (Corgnali). Tal 1627 Sig. Antonio Grimaldi, corso, capitano abitante a Palma (Biasutti).

Forsit di cualchi toponim derivât dal sloven grm “baraç". Chest cognon si lu cjate intes frazions slovenofonis dal comun di Atimis e tal comun di Faedis (emigrât a Udin e a Tavagnà). Tal 1701, ai 28 di Lui don Nicolò Grimaz di Tomaso q. Dom. de Clap – il padre gli fa patrim. eccl. (Patrimonium).

Par Ceschia 1981 al podarès derivâ di Grünau, centri abitât a Ovest di Salisburc (Austrie). Al podarès ancje rifleti il todesc Grünhoffer (un Hermann Grünhoffer al jere comandant dal presidi arciducâl di Maran tal 1542). La forme Grinòver si le cjate a Cormons e a Gurize; Grinovero a Prepot (1591 Biagio Grinovero condannato alle galere per anni tre), Cividât, Gurize, Premariâs (culì, però, pal Lunâri di Orsaria dal 2001, la forme locâl e je Garnover, al feminin Garnovera).

Al è une probabile forme italianizade di Grion (viodi) che e rifletarès il non di Grions: si clamin cussì doi centris abitâts, un in comun di Paulêt e chel altri in comun di Sedean. No scartìn un incressitîf di gri. Si lu cjate a San Zuan dal Nadison e a Manzan.

Si lu cjate a Monfalcon.

Di gris, che par furlan come intai dialets dal Cjadovri, al vûl dî “grîs". No scartìn dal dut un toponim: par esempli Grîs di Bicinins. Cognon presint in ciertis localitâts de provincie di Belum e a Codroip.

Probabile variante dal non Crisostomo. Cognon di Manià; presint a Pordenon.

Dal adietîf venit griso “grîs". Al pues vignî di Cjaudistrie. (Bonifacio 2004, 151-52). Si lu cjate a Udin e a Gurize.

Cognon cuntune difusion moderade a Vignesie, Trevîs e in provincie di Bressie; inte nestre regjon si lu cjate a Udin.

Di Grizzo (Griz), centri abitât in comun di Montreâl. O fasìn dut câs notâ che tal Tresinte Griç al podeve jessi un non di persone: a Glemone tal 1368 un Pieri di mestri Griç. Al è une vore frecuent a Pordenon; presint a Cordenons.

Forsit di Grions, non di doi centris abitâts, un in comun di Paulêt e chel altri in comun di Sedean. Grion al podarès ancje jessi l'incressitîf di gri. Tal Tresinte a Muimans un Iacumis Griglion (Ziani, 1999). Tal 1557 al jere a stâ a Cormons Jacobus de Griono (FS). Intal Schedari Corgnali: 1344 q. Grioni de Silvella; 1347 Iacunissij Grilon a Muimans; 1374 Saya q. Griglons de Grions de Tor; 1574 Natalis Grionus a Cormons; 1929 Grion 4 fameis a Cormons. Carateristic di Caprive; si lu cjate ancje a Gurize (culì ae fin dal Cinccent un Gryon Dominico), Udin, Mosse, San Lurinç Lisuntin, Dael, Manzan, Premariâs (il Lunâri di Orsaria dal 2001 al ripuarte ancje la forme feminine Griona).

Si lu cjate a Pieris.