Al somee une derivazion dal venit lache “cuessis, gjambis" che di chel al ven “tirar le lache", variante venite de espression une vore famose “tirâ i sghirets". Lis “lache" a derivin dal latin lacca “sglonfadure a forme di vissie tes talpis dai animâi di cjame", che po al è passât a indicâ lis stessis part anatomichis tal om, come tal talian antîc lacca “ombul, cuesse" (Dario Soranzo, in “la Nuova Venezia", ai 25 di Novembar dal 1996).
Dutis dôs lis formis a son carateristichis di Sante Luzie (Budoie).
fonts
1593 Ser Daniel Lachesin della Villa di Dardago, debitore della Fraterna di S. Rocco di Polcenigo (ASU CRS 352); 1633 eredi q. Antonio Comin d.° Lachin di S.ta Lucia di Budoie (ASU CRS 352); 1736 M.° Gio. Batta Lachin di S. Lucia, consigliere della Scuola del SS.mo Rosario di Dardago di Budoia (ASU CRS 209); 1915 al rive a Bresse Leopoldo Lacchin, nassût a Davian tal 1884 (Fantini e Romanello, 2002); 1929 al mûr a Sacîl Giuseppe Lacchin, impresari. Al veve fat sù dal nuie, soredut te zone di Sacîl, un complès di industriis e di ativitâts comerciâls che i vevin dât innomine in dut il mont, tant che precursôr des tecnichis modernis di conservazion e di vendite dai prodots alimentârs. Al jere nassût a Vignesie tal 1857 di gjenitôrs rivâts di Budoie (Angelillo, 2002).