Al ven di un non di persone che al varès di corispuindi al talian Lanfredo, di clare origjin gjermaniche, documentât in Italie dal secul VIII (Lanfredus, Lanfridus) e che in documents langobarts al comparìs ancje come Lamfrid (npI 752). Land-fried al pues volê dî “paîs di pâs" o, miôr, “pâs tal paîs". Al è un cognon origjinari de Plêf di Sant Martin dulà che al è documentât dal Tresinte a Anduins, passât a Forgjarie (culì un Lanfrit di Pitas tal 1415 e un Urban di Pietro di Lanfrit tal 1504) e di altris bandis. A Pinçan un Denel di Lanfrit tal 1450 (Scatton, 1994).