La fonde di chest cognon e varès di jessi il non Lena, forme aferetiche di Maddalena o, plui probabil, Elena. Al è facil che a Lena si sedi zontât il sufìs diminutîf –ìs (il stes che si cjate in Bertolissi, Brunisso, Menis, e v.i.) al feminin -issa. La pronunzie corete e varès di jessi duncje Lenissa; a son altris câs li che il sun -ss- al comparìs tant che -s- tes formis uficiâls, straviant cussì la pronunzie (par es. Nicoloso, Peresani). Viodi ancje De Stefani 2003, 283. Tipic di Preon; si lu cjate ancje a Udin, Cjanive e Pucinie (culì al è documentât tal 1815).