De vôs macàn “abenât" che si pues cjatâ ancje tra i nons di cjasade (par es. a Vasinis di Trasaghis tal cognon Di Doi). Tal Schedari Corgnali: 1319 Macano fistulatori de S. Margherita; 1325 Machano de Braçaco. Cognon documentât par antîc e ancje in dì di vuê une vore presint a Vilegnove di Prate (Fadelli, inf. pers.). Si lu cjate ancje a Pasian di Pordenon, Pordenon, Bagnarole e Marignane di Siest. A For Disore il toponim Busa di Macàn, li che Macàn al jere l'om dala gna Macàna.

Probabil diminutîf di macàn “abenât", o di Makka, non di persone di divignince gjermaniche (Olivieri, 1923). “Une famee che e je a stâ a Barbean (in comun di Spilimberc) di passe cuatri secui e je chê dai Machanino. La prime menzon e rimonte ai 3 di Març dal 1581, cuant che Caterina, vedue di Theiopo Macanino e obleave il fiolo Piero a tirâ fûr liris 15,50 par fâ dî une messe ad an a solêf de sô anime” (Spagnolo, 1994). Tal Schedari Corgnali: 1264 Machagnino a Glemone; 1341 Marcus dictus Machagnino de Conoglano; 1420 Dominicus de Machagnin de Cincto; 1427 Machagnini de Masignana a Siest; 1444 Iacobus Dominici Machagnini de Cinto.