Forsit di Makka, non medievâl di persone di divignince gjermaniche (Olivieri, 1923). Po stâi che al sedi ancje un non (o sorenon) todesc jentrât, come altris, in Cjargne e, in chest câs, tal Cjanâl Pedarç (comun di Prât di Cjargne) li che chest cognon al è endemic e documentât almancul dal 1472 cun Leonardus q. Antonii del Machen. E po, 1479 Joanne del Machen (ma tal 1488 a Davaste Biagio q. Zuane del Machin); 1535 petrum del machen par rivâ, tal 1550, a une forme dongje a chê di cumò cun Antonii del Machin (A. Roia). Tal 1625, a Glemone, Ser Valentino Smachen. Viodi ancje De Stefani 2003, 246. Presint ancje a Udin.