Al è un cognon carateristic di Resie, li che al è endemic a Oseac (1657 Zuanne Modot Mastillaro; intun document dal 1739 al è simpri scrit Modotto) e a Coritis (che al fo, fin al inizi dal Votcent, colonie di Oseac par lâ a cjamâ la mont); si cjate ancje a Tarvis, Glemone, Udin. Al podarès rivâ dal sostantîf cjargnel (Cjanâl di Guart) modòt, che al è l’ecuivalent di sensâr e di missète, intindût soredut come "mediatôr di matrimonis". La trasformazion de prime o in a e coincît cun l’akanje, trasformazion des o atonis in a, tipiche dai dialets slovens de zone alte dal Lusinç: la forme cognominâl Madotto e po duncje tignîsi tant che un adatament in aree linguistiche slovene (a Resie si fevele, cemût che si sa, un dialet sloven) dal cognon origjinari Modotto (Merkù, 1981). Nô o pensìn ancje a une forme aferetiche di Tomadòt, incressitîf di Tomât, variante di Tomâs “Tommaso": tal 1469, a Oseac, al è documentât un Antonius Tomadotti (Schedari Corgnali). A chest pont viodi ancje sot di Modotti.