Al vûl dî “origjinari di Madrîs", non di doi centris abitâts, un in comun di Feagne e chel altri in comun di Vildivar. I Madrisotti di Lavarian (comun di Mortean) a cjapin il non di Madrisio di Vildivar parcè che cussì nus scrîf Walter Ceschia “de vision di cualchi pergamene si po concludi, cence nissune pôre di ritratazion, che il cognon atuâl Madrisotti al à origjin tal secul XV, propit di une componente di valôr etnic, ven a stâi l’apelatîf Madrisòt dât par indicâ la divignince, vâl a dî “origjinari di Madrîs". E chest al sucedè in primis par une migrazion fate di un dissendent de nobile famee dai Madrîs di Vildivar (Petrus de Madris-Ungrispacher, filii quondam Henricus de Cormono), che al le a stâ a Samardencje di Lavarian (Parochie costituide prime dal 1300), tor de metât dal Cuatricent. Chei dal puest a clamarin Madrisotti chescj gnûfs rivâts. Par cheste reson, i prins Madrisotus regjistrâts tai scrits dal secul XVI a vegnin fûr dome tai regjistris de parochie di Lavarian, di dulà che juste apont e dipendeve Samardencje, e no in altris".