Plui che non di persone Amadèu (par talian “Amedeo") traviers la forme diminutive cjarinative Amadùs e la disparizion (aferesi) de part iniziâl, al somee vignî di Tomât “Tommaso", o de sô forme feminine Tomàda, traviers Tomadùs (il sufìs -ùs, diminutîf, al jere pluitost frecuent): 1434 Tomaso d.° Madus (Schedari Biasutti); 1464 campum Thomadi nominato Madus a Favuîs (Schedari Corgnali). Un Tomadùs al è documentât a Cividât tal 1301, un Thomadus a Cormons tal 1386, un Tomadus de Agielo tal 1437. A Nimis tal 1440 Giovanni q. Madusso. Tal 1557 a Glemone Maria Margareta filia Thomae filii q. Madusii de Stalis. In Corgnali: 1365 Amadussio alis Madussio calcifice a Atimis; 1370 Madussio q. Petri de Utino; 1393 q. Madussii de Maranzanis; 1413 Thomas dictus Madussius de Marnico; 1427 Thomat det Madus a Cjaminet; 1468 Daniel Madussij de Camineto. Al è un cognon carateristic di Dartigne (1522 Sebastiano Madussi q. Giacomo); presint ancje a Magnan. A Buie, une vore rare, la forme Madusso. In cheste ultime localitât il toponim Cjamadùs (= Cja’ Madùs): borgade fate di uns vincj cjasis, tra chestis vilis bielonis, su la vie San Denêl, tra San Scjefin e Ursinìns Piçul (Calligaro, 1925).