Forsit di un non personâl *Mago, forme scurtade di Magaldo, non di divignince gjermaniche. Al è probabil che chest Mago al sedi nassût ancje par vie dal inflùs dai sostantîfs mago e maga (Rapelli, 1995 sub Maghìn). Culì o podìn citâ il furlan antîc magàlt “berton, servent", e magàlde “femine di costums no bogns, sdrondine".
Si lu cjate a Breçan di Cormons.
fonts
1664 M.° Giacomo Maget contadino di Cormons (ACAU 727/2); 1715 Francesco Maghet di Porcia, potestà di Cormons (ACAU 726/1); 1991 al mûr il predi Guido Maghet, sostignidôr mai strac de furlanetât dal Gurizan. Al jere nassût a Breçan (Cormons) tal 1920 (Nazzi, 1992).