Malghìn (in mût coret Maligoi) al è un cognon rivât a Briscjis in comun di Pulfar plui o mancul tor dal 1775-1780 de val dal Lusinç li dongje e di un precîs dal paisut di Smast, logât su la rive di çampe dal Lusinç, lontan 4 chilometris di Cjaurêt e che al fâs part de parochie di Libušnje, che une volte e jere sot de “cure” di Tulmin. La forme origjinarie e juste dal cognon e jere Maligoj, che i plevans di San Pieri adore i àn mudât i conotâts par vie di une trascrizion o di une comprension dal cognon falade. E cussì dal 1785 indevant Maligoj al è stât trasformât prime in Malgin e po in Malghin. Cheste trasformazion o coruzion dal cognon e je evidente se o nin a scrutinâ i libris e il Status animarum de parochie di San Pieri. Ai 4 di Avost dal 1784 Stephanus filius qm. Joannis Maligoi de Smast paroeciae Tulminensis qui per plures annos commoratus est sub hac cura Sti Petri si maride cun Catharina filia Joannis Peternel de Biarzo. Stiefin, come tancj altris zovins slovens de val dal Lusinç e de Šentiviška gora si jere rifugjât te val dal Nadison salacor par evitâ la jeve militâr che in Austrie e jere obligatorie. Ai 11 di Otubar dal 1785 al ven batiât Antonius filius legitimus et naturalis Stephani Malgin de facto habitantis Brischis et ejus uxoris Catherinae. Maligoj di Briscjis, po corot in Malghin, al è duncje un cognon sloven di origjin controlade che, par vieri, al jere difondût no dome a Smast, ma ancje tal paisut di Kamno (1665 filius Vrbani Maligoj de Camana Libris dai batisims di San Pieri). Al è probabil che al sedi nassût, cu la formante -goj, dal adietîf sloven mali “piçul”. Al va marcât che i cognons slovens cun desinence in -goj (par esempli Bodigoj, Saligoj, Plasigoj, Guligoj) a pandin cualchi volte dai nons di persone une vore antîcs che a podaressin lâ indaûr al periodi de colonizazion slave / slovene des Alps orientâls (Zuanella, Dom, 4, 1997).