Dentesano 1994 lu viôt come une variante di Morello e, duncje, dal adietîf moro; par Bongioanni 1928 al podarès rivâ dal non di persone Ademaro (o altris cu la finâl -maro) traviers di (Ade)marello. Stant che la forme plui antighe regjistrade, a mancul che nol sedi un erôr, e je Murello, al podarès ancje jessi il furlan murel “breute che e covente te impalcadure dai cuvierts, o, se di no, tes costruzions, fermât a altris lens di fuarce plui grande" (NP) e, si che duncje, di un non o sorenon di mistîr. Morello al jere une unitât di misure che e segnave il spessôr des breis e dai modons (Perusini, Vita di popolo in Friuli). Murèl al è ancje “murel di luianie". Cognon carateristic di Flambri in comun di Talmassons.