Forsit di marmâe, cussì come di canâe si à canài. Si podarès ancje meti dongje al talian disusât marmàio “marmist”. O viodìn che chest cognon si cjate ancje tal Mantoan e, tal Bressan, al è il compagn Marmàglio. Tal 1502 Ser Nicolò de Gubertinis notaio detto Marmao a Udin (i Gubertini a jerin di divignince lombarde). Presint a Tramonç Disot (Vile di Mieç) li che al è documentât dal 1641 (Luchini, 1997), Vile di Cjargne, Enemonç, Udin. Plui lade insot e documentade la tratazion che 'ndi fâs De Stefani 2000: “Il cognon Marmài al è di svariadis zonis de Cjargne (Enemonç, Vile di Cjargne, Divilin e Cjaulis frazion di Verzegnis). Al salte fûr ancje te aree di Pordenon, a Midun e a Tramonç Disot. In graciis dal Corgnali o savìn che tal 1938 a vivevin cuatri fameis Marmai a Prât di Cjargne. A jerin ben nûf fameis a Tramonç Disot, li che in dì di vuê il cognon al è râr. Un Nicolaus dictus Marmoglia de Glemona al è documentât tal 1340. Un Zuan Domeni fiol di Zuan Marmau al è certificât invezit a Vergnà tal 1568. I Marmai dal Cjanâl di Tramonç a vivevin e a vivin a Tramonç Di Mieç, li che a son documentabii de seconde metât dal Cinccent: ai 23 di Setembar dal 1573 a comparissin in chê comunitât Valentino q. Giorgij Zunulini dicti Marmaij e Iacobo Zunulino q. Lionardi Marmaij. Un Leonardo Marmai al è po testemoni intun at butât jù a Tramonç Di Mieç ai 4 di Març dal 1709. Par cont dal etim, si po pensâ al furlan marmâe, marmàje “marmaglia” che al podeve jessi dât a une famee numerose. In dut câs, al somee che no sedi cheste la motivazion imediade di dulà che al è vignût fûr il cognon. Si scuen tignî a ments che, in ciertis bandis, a vignivin segnâts cu la vôs marmàia ancje i fantats che, dilunc de menade dal legnam, a metevin in aghe i troncs dai arzins artificiâi. In cualchi maniere, a jerin aprendiscj menaus. Si sa che tal Cjanâl di Tramonç e tal Cjanâl da la Celine, te zone di Claut, a vivevin i lavoradôrs plui brâfs, tant che a jerin cognossûts parfin in diviers Paîs de Europe di Soreli jevât. Al è significatîf che il cognon Marmai si fos svilupât a Tramonç di Mieç. Di chê zone, ma ancje de Cjargne, a vignivin tancj boscadôrs e menaus, 'chei che a menin il legnam sul torint’. Al è juste apont in chê aree che al nas il cognon Marmai “.