Marocchi al è presint a Tisane, ma al è ben plui difondût a Mantue e a Bressie; Marocco al è, invezit, un cognon gradesan tipic (1598 Dona Hipolita uxore Ser Marci da Nona nuncupati Marocco). Al è regjistrât avonde par antîc a Darzin: 1476 Maroch; 1524 Marochij; e v.i. (Petris, 1999) e a Manià (1613 Lenardo di Colao Marocho). Tal Schedari Corgnali: 1327 Marochi de Concordia; 1341 Iacobus condam Martini dicti Maroch de Racolana; 1366 Aurelius f. Marochi de Bratiulo. Al è probabil che al vedi vût diviersis derivazions: al podarès jessi une forme aferetiche dal non di persone Ademaro (o altris che a finissin in -maro), cu la zonte dal sufìs -òc, che te onomastiche nol è dal dut discognossût; tal câs di localitâts di mâr (Grau), o dongje dal mâr, o pendìn par maròc,, non di un pessut di mâr (par talian Gobio ceruleo). Maròc al è deventât sinonim di “starlocj, stupit” (ancje in Cjargne) e, par chest, al pues vê dât origjin a sorenons e, duncje, a cognons (1487 Zuan Maroch a Tumieç). Tal dialet padoan maròco al sta par “gnogno” (Olivieri, 1923). Secont di Rapelli 1995, chescj cognons a rivin di nons di localitâts come Marocco (frazion di Mogliano Veneto e di Mestre) o Marocchi (frazion di Poirino, in provincie di Turin). Pai Marocco di Grau viodi in ogni câs Scaramuzza 2001. Tal 1613 un ciert Zuanne al deponeve cussì: “Io Zuanne figliolo di Domenego Berulo ho visto Lenardo di Colao Marocho et altri di Maniago Libero con pecore, capre e buoi et taiar legni nel monte di Avragna et Pala Curta, et Pala Formosa poco di sotto Crose dove è loco e giurisdizione di quelli di Andreis, nel qual giorno Piero di malattia mio barba et io andavamo in Friul” (di Rosa, 1981).