Il cognon Martinig / Martínič al è il cognon tipic dal paîs di Cepletiscjis (comun di Savogne) che si cjate da pît de mont San Martin, li che su la piche e je in dì di vuê la gleseute cul stes non. La devozion a Sant Martin di Tours e à favorît, tra la popolazion dal puest, la difusion dal non propri Martin e di chest al è po vignût fûr, cul sufìs sloven tipic -ič (scrit -ig) il cognon Martinič / Martinig che duncje al vûl dî “il fi di Martin”. Chest cognon si cjate in dì di vuê ancje a Cividât e in altris localitâts furlanis (Zuanella, Dom, 11, 1988). Bielzà tal inizi dal Cuatricent un Thomas Martinic a Prepot (Corgnali, 1965-67, p. 173). Fûr de aree slovenofone o cjatìn a Glemone tal 1350 Iachu filg Martiniç bariglar (Vicario, 2001), che forsit al è il stes Iacobo q. Martiniç che si cjate tal Corgnali tal stes an, e tal 1379 Christoforus filius Martini quondam Martiniç, Martinus filius Iacobi Martiniç, Stiphinia uxor Iacobi Martiniç (De Vitt, 2000).