Martellòs, Martelòs, Martelossi
Al ven spontani pensâ a martello, non di un imprest e, duncje, a une derivazion di un non di mistîr (deventât ancje non di persone). No nus pâr nancje incongrui pensâ ancje a une forme scurtade dal non di persone Martino.
Un Piery Martel al è documentât a Cividât tal 1422; tai secui seguitîfs al è un cognon: 1549 Jacomo Martel, fittuale Fraterna di S. Rocco di Pordenone (ASU CRS 372/1); 1609 Heredi q. Jacomo Martel de Borgo Pordenon debitori Sigg. Popaite (ASU Popaite 7.3).
Il sufìs -òs, che la sô funzion no je stade ancjemò sclaride ben, si cjate in plusôrs altris cognons di chenti (Bottòs, Cattarossi, Carnelòs, Bertossi, Micossi, e v.i.).
Dit chest, o crodìn plui interessant fâ riferiment al venit martelóso (in cualchi localitât martalós), une vôs storiche doprade di râr cul sens di “trist, malindât”, ma pluitost cognossude tal Venit dal secul XVI. Al somee che al vegni dal turc martoloz “volontari armât di confin al servizi dai Turcs e ancje dai Austroongjarês“ (Marcato, 1982). Lant daûr di Puntin 2010, 10 al sarès un cognon che al ricuarde la imigrazion in Istrie, sul Cjars e tal Friûl orientâl di grups che a rivavin de Dalmazie, dai Balcans e de Albanie tai agns de avanzade turche, soredut tai secui XV-XVI; i Martelossi (todesc antîc Martilauer, sloven Martolozi) in origjin a jerin pastôrs e a vignivin dal Montenegro e de Albanie.
Lis dôs formis Martellòs e Martelòs si cjatin a Romans dal Lusinç; Martelossi al è presint soredut a Gonârs e a San Zuan dal Nadison e, tun secont timp, a Gardiscje, Çarvignan, Basandiele di Cjampfuarmit (rivât culì tal 1839 cun Giacomo Martelossi natîf di Solescjan e tal 1853 cun Domenico Martellosso natîf di Cuar di Rosacis), Udin.
fonts
1677, ai 27 di Mai Ser Pietro Martelosso – L’Osp. Udine gli dà £ 102 s. 18 per aver applicato un suo secreto per le Fanzose (o franzose) – (Osp. Vacch. Cameraro c. 5); 1761 Gion Batta Martelosso, cameraro Fraterna del SS.mo Rosario di Sevegliano (ASU CRS 492); 1767, ai 30 di Lui don Gio. Batta Martellosso di Ser Dom. da S. Giovanni Manzano, il padre e zio Gio. Batta gli fanno patrim. eccl. (Patrimoni); 1779 Rev. Gio. Batta Martelossi, cappelano delli Pastori in Medeuza (ACAU 718/7); 1787 Dom.co e Michaele Martellosso in Vicinia Soleschiano (ASU Perusini 274); 1793, ai 8 di Novembar don Gio. Batta Martelossi di S. Lorenzo Soleschiano, da 12 anni a Medeuzza capp. Messa dei pastori, pio, sobrio, pacifico. Da 4 anni capp. domestico del co. Giulio Ant. Strassoldo Soffumbergo con la cui famiglia viveva almeno da mezzo anno in Ioannis (Filze); 1809 Dom.co Martelos possiede due bovi in Palmada (ASU Della Torre/B 30); 1815 Dom.co Mertelosso nato in Manzano nel 1785 figlio di Antonio da S. Lorenzo, sarto, sposa Madalena Saccavino da Moimacco (A.P. Manzan); 1816 Giovanna Martelossi di Pietro nata in Bolzano nel 1790, sposa Pietro Lucani di Dom. co da Bolzano (A.P. San Zuan dal Nadison); 1839 al rive a Basandiele Giacomo Martelossi di Domenico, vilan, nassût tal 1813 a Solescjan (Fantini e Romanello, 2002).