Par venezian antîc al voleve dî e par furlan al vûl dî “miôr". Al sarà duncje stât un sorenon, forsit a voltis soradin. Al podeve però jessi ancje non di persone (Meliorus tal 1185 a Modena; Migliore tal Cuatricent a Verone e, te nestre regjon Meliore de Bratiullo tal 1293, Myor fyo de Andrea de Peligrino de Pratorlono tal 1499), prosecuzion dal non propri latin Melior “miôr", non di bon auguri dât a un frutin a pene nassût (v. Violi 1996). Tal Schedari Corgnali: 1539 Mior de Miori a Villotta de Sbroiavacca; 1540 Mior de Codopè. Chest cognon al pâr jessi carateristic di Vilefrancje di Taiêt in comun di Cjons (1477 Migliorio Galli a Vilote di Cjons; 1543 Blas de Meglior de Villotta; 1697 Crispin Mior a Vilote) e al è pluitost ben rapresentât a San Vît dal Tiliment; si lu cjate ancje a Puart, Cjasarse, Morsan da lis Ocjis, Çopule, Cjaurlis, Concuardie.

Probabil diminutîf di Miór (viodi); gjavant il câs che nol vegni di maiorìn, diminutîf di màier (viodi Màier), vôs par antîc doprade ancje in Venit. Tal 1325 Miorino q. Jacobi, piscatore de Muçana (Corgnali). La forme Miorìn e je presinte a Cjasarse, Concuardie, San Michêl, Cint; Miorini si cjate a Spilimberc e a Maian.