Cognon dificil di interpretâ. Po stâi che e sedi une forme aferetiche di Tramonciàt “che al è a stâ o che al ven di Tramonç", sul model di Buie / Bujàt, Glemone / Glemonàt, Cose / Cosàt, e v.i. (Colledani, informazion personâl). Dal sigûr il pas di Monciàt a Mongiàt al sarès curt. Si scuen dî che la pronunzie furlane di “Tramonti" e pues jessi Tramònç e duncje Tramonciàt (Tramonçàt) al pues jessi plui che justificât. Intune pergamene de Plêf di Dardâc si nomene, tal 1400, un ciert Antonio di Bartolomeo da Tramoncio (Alfier D., in “L’Artugna", n. 28, 1979, p. 20). Il fat al è che chest cognon al è presint massime a Tramonç Disot e a Tramonç Disore; la sô presince e je buine ancje a Manià, Spilimberc, Fane, Secuals, Midun, Pordenon.