In principi si sarà riferît a une persone che e vignive de mont, o pûr al derivarà di un non di lûc. Tignìn cont che il toponim Mont al pues esisti ancje in zonis che no son propit alpinis (par esempli Mont di Buie, Mont di Ruvigne; la Mont e je il Cuel di Migjee; a Tresesin la Mont par ecelence e je il cuel tra il cjâf lûc e Adorgnan) e che, inte nestre zone di mont e inte pedemontane, ogni paîs al à la sô Mont che, in plui che “mont”, e jere un “mont” cuntun mût di vivi diferent a pet di chel dal paîs. E pues jessi interessante, chi, la osservazion di Zucchiatti 2000 dulà che il non mont “al ven dât aes parts plui altis dai rilêfs, tant ai cuei che aes monts veris. Al somee che la diference tra Cuei e Mont e sedi une esclusive dai tescj di gjeografie, ma te lenghe fevelade i doi tiermins a son cuasi compagns” (po al cite diviers toponims cun Mont tal comun culinâr di Feagne). A Buie, Mont e je una borgade cuntune desene di cjasis, e pôc lontan di chês si jeve la plêf di Sant Lurinç, cu la carateristiche tor pentagonâl; si divît in Mont di Zoc che e cjape dentri dute la part adalt e lis rivis revidis di cuote 332 e in Mont di San Bastiàn, che e cjape dentri la piçule plane trasformade in ridotis e magazens te prime vuere mondiâl, dopo vê gjavât vie des fondis la gleseute viere di Sant Sebastian, glesie antighe e primordiâl di Buie. Partint di cuote 337, il cuel al finìs dongje Strambons e Sacastoie: i siei versants, tant che chel setentrionâl, a son cuvierts di un boscam fis di cjastinârs, olms e agaciis (Calligaro, 1924-25). A Dartigne la Mont e je une regjon vaste che e domine il paìs a soreli jevât e che e va jù dal Faêt cun gombis staronzadis. E da il non ae borgade di Mont (al è une vore probabil che il cognon al vegni di li) che e je dividude in plui grups di cjasis (ognidun distint pal plui cun antropotoponims) e costruide suntun rilêf che si distache de rive. Te part plui adalt a son cetancj cjastinârs, ma a vegnin sù ben ancje altris latifoliis e si slargjin ancje passons e terens sterps (Desinan, 1972). La concentrazion plui alte di De Monte si le à a Dartigne (chi tal 1567 a jerin cuatri fameis par une ventine di personis), a Ruvigne (chi, come che si è ricuardât, la Mont di Ruvigne), a Dimpeç, e dopo, ma plui distacadis, a Buie (chi di Mont al è ancje sorenon di famee tra i Comoretto, Agnul di Mont al è sorenon di famee tant tra i Comoretto che tra i Calligaro), a Udin, San Denêl, Tumieç, Darte, Tavagnà, Vildivar, Maian, Tarcint, Cordovât, Spilimberc, Pordenon. Intal Schedari Corgnali: 1299 Jacobi de Monte de Vençono; 1451 Jacobum de Montibus a Pordenon; 1938 De Monte 15 fameis a Dimpeç, 7 a Darte, 3 a Priûs. Te sagristie de glesie di Sante Margarite dal Gruagn e je inmurade une lapide che e dîs: 1457 Hoc opus (il cjampanili) fecit fieri Johannes Camerarius tempore Presbiteri Antonii de Ragonae / Ant. Marcus de Monte (Marinelli O., Guida delle Prealpi Giulie, II, 1912, pagj. 506).

Tant che De Monte (viodi). Presint a Porpêt, Darte e Tumieç. Tal 1653 Gio. Batta di Monte di Franc. di Fielis sp. in Zuglio Margarita Colautto d’Ant. d’Avosacco (ASU Gortani I part doc. 6.96).

Al varà indicât la aree gjeografiche di divignince, ma viodi ancje Monti. Cognon presint a Tor di Zuin, Cjasteons di Strade, San Zorç di Noiâr, Talmassons, Pucinie (documentât tal 1760 a Paravîs, tal 1880 a Torse), Udin, e vie indenant.

Dal centri abitât omonim in comun di Cjassà. Cognon presint massime a Udin.

Cognon di Roncjis di Tisane. Tal 1820 Maddalena Montello nata in Latisana nel 1794, figlia di Tommaso da Ronchis, villica, sposa Marco Simonini da Madrisio di Varmo (A.P. Tisane).

Si lu cjate a Pordenon e al è difondût te zone di Vignesie. Tal 1634 Nob. Sig. Prospero Montereale, sindico della Luminaria di S. Paulo di Pasian di Prata (ASU CRS 347/2).

Si lu cjate a Udin.