Monài al è il non tradizionâl di Ravasclêt, ma monài, in Cjargne, al è ancje un “scompart dal prât in relazion al sfalç: cuant che la passade e je vignude fûr masse lungje, il prât si divît dal alt in bas in doi o plui monàis " (NP). A Gjiviane si definìs un monài come lu toc di prât cu sci comenciavo abàs e a sci seàvo fin insòm (Faleschini, Sot la Nape, 3-4, 1980). Chest cognon al è avonde difondût a Cesclans di Cjavaç (ma lis primis atestazions a son relativis a Cjavaç: 1575 Melchior Monai; 1582 Maria filia Antonii Monaii et Hellena jugalium de Cavatio), Damâr e Nimis, cun presincis a Cividât, Palme, Udin. Pai Monài di Damâr o din la peraule a Moroldo 1999, ancje parcè che al zonte une vore di notiziis interessantis: “Di là che a Damâr, chest al è un cognon che par antîc al jere cetant difondût tal teritori di Cesclans e mancul a Cjavaç, ma che lis sôs origjinis a son cun probabilitât di cjatâ in altrò. Dopo variis ricercjis e consultazions di tescj e di archivis, o sin rivâts ae ipotesi che il lûc di probabile divignince di cheste gjernazie al vedi di jessi cirût in Monài di Ravascêt. A saressin fameis, o personis singulis, che a son jessudis fûr plui voltis di chel borc di mont e si son stabilidis prime a Cesclans e vie pal timp tornadis a migrâ viers Damâr. Il moviment di Cesclans viers Damâr al è ben documentât tai varis regjistris des parochiis cuntune vore di anotazions dai plevans. Probabil che a Cesclans al sarès stat dât lôr un apelatîf leât al toponim, vâl a dî un sorenon leât al lûc di divignince: chei di Monài. Cul non coletîf di Monài (dispès scrit Monay) za tor dal 1308 si cjatavin adun lis ints di Ravasclêt, Palù, Salârs e plui tart ancje di Zuviel. La stirpe plui numerose e risulte regjistrade a Damâr almancul dai prins decenis dal 1500 cun Giovanni Monay. I plevans a regjistrin simpri il cognon cu la -y finâl, propit cemût che in svariâts documents di chê volte al vignive notât il non de localitât di Monay. Almancul altris dôs cjasadis a rivaran in paîs rivant di Cesclans e di Cjavaç: la prime tor dal 1670 cirche cun Monay Giacomo; la seconde tor dal 1730 cirche cun Monai Gerolamo sorenomenât Mulinâr par vie dal mistîr che al faseve. Dutis dôs chestis ultimis cjasadis a son discomparidis, invezit e va indevant cuntun numar alt di membris la cjasade dal 1500".