Forsit al è il diminutîf di maròc “stupit" (... noma ìa a podeva vîai insegnât a chel maròc di Toni una tâl scuela frase te fevele di Prât di Cjargne, dal NP). Un Zuan Maroch al è documentât a Tumieç ae fin dal Cuatricent. O di maròche “robe scarte". Maròc al è ancje il non di un pes di mâr (par talian, il Gobio ceruleo). No si à di escludi une derivazion dal adietîf moro, che al à un significât clâr, cu la zonte dal sufìs -òc, pôc frecuent (salacor cuntun valôr incressitîf) e dal sufìs -ùt, une vore comun e cun valôr diminutîf. Dopo di chescj resonaments ingredeâts, ancje se valits, o vin discuviert che Moròc al jere non di persone e o ripuartìn ce che al scrîf Puntel 1998: “Il non Morocco (par furlan Moroch o Maroch) si lu cjate in plui documents dal secul XIV che a tocjin la Val Pontaibe. Intun testament dai 21 di Novembar dal 1348, conservât intai archivis di Paluce, si fevele di un tâl Giovanni Morocho q. Nicolò da Lyusulo e di Pietro e Vargendo fîs dal q. Giovanni Morocco. Inte stesse date al è un Enrico Moroch di Zenodis. Ai 15 di Zenâr dal 1349 al è testemoni intun altri testament Enrico q. Morocco di Siai. Tal secul dopo si formaran i cognons di vuê cun cualchi variante. Cussì ai 21 di Mai dal 1476 Leonardo Muruchutti e Matteo q. Odorico Muruchutti di Liussûl a pain il fit ae glesie di S. Denêl par un cjamp. Cualchi an dopo a Taussie al è presint un ciert Matteo di Zuan Muruchut. Tal secul XVI chest cognon si slargje te valade, dongje dal vecjo Morocco che al finirà cun Giacomo (muart tal 1675) che, pal so mistîr di mulinâr, al ven clamât Molinaro e al da, in cheste maniere, origjin ae famee Molinari. In cambi, al lasse il so vecjo non di famee a un borc di Murçalis che inmò vuê al à non Maròc. Ma parcè Morocutti vignial colegât a Morocco? Parcè che Morocutti al è diminutîf di Morocco, tant che Biasutti al è diminutîf di Biagio e Miniutti al è diminutîf di Domenico. Morocco (par furlan Maròc) al è un non propri di persone une vore comun te Ete di Mieç ancje in Italie, che al è deventât ancje cognon (viodi Marocchi). Al è il non di un sant! Tal De Scotorum Fortitudine publicât a Parîs tal 1631, David Camerarius al aferme che San Moroc al jere l'abât de abazie di Dunkeld (Scozie) tal secul IX. La sô fieste si celebre ai 8 di Novembar. Il cognon Morocutti si difont intun prin moment a Liussûl e a Taussie. Di chestis dôs localitâts alì, al passe dopo a Trep di Cjargne. Giovanni, che al jere de prime gjenerazion dai Morocutti di Siai, al fâs sù tal 1631 la cjase dite Convènt a Treli (Paulâr), domandant ae comunitât di vignî acetât tant che vicin par podê maridâsi cuntune fantate dal puest. La assemblee de vicinie e veve dât un parê favorevul ae integrazion che però, di fat, no si puartà insom a dispiet dai sfuarçs di Giovanni che, ae fin, al à scugnût lâ vie e comprâ une cjase antighe a Zui, vile che e faseve part dal so cjanâl di origjin. Chest al sclarìs parcè che Giovanni al fo il progjenitôr dai Morocutti di Zui. Vuê i Morocutti a son presints in diviersis parts dal Friûl, de Italie e soredut in Austrie; in chest ultin câs, a son i dissendents dai cramârs o slaifers emigrâts intai ultins trê secui. In Gjermanie si clamin Morgott e a vegnin di un ciert Giovanni Morocutti Teck emigrât a Spalt, in Baviere, tal 1726. Te Val Pontaibe, ae fin dal 1997 a vivevin cirche 80 personis cun chest cognon che a rapresentavin il 10% de popolazion". Il cognon al è presint a Tumieç, Udin, Cjassà, Vile di Cjargne (e Bressie!).