Al è un cognon endemic, par no dî esclusîf, di Stermize (comun di Savogne) dulà che al è presint di 222 agns. Lis sôs lidrîs però a son in altrò, in particolâr tal paîs dongje di Masseris. Chi, la part orientâl dal paîs, di là di un riul che une volte lu divideve in doi e vuê al è cuviert, e je stade fate sù suntun teren clamât Múrove (1713 filius Matthaei Massera filij Laurentij de Masseris Namurouim tal Libri dai batisims di San Pieri). I abitants che a vivin in cheste zone, ven a stâi Na múrovin, a son clamâts Murúščaki (al singolâr Murúščak Muruszach te forme grafiche arcaiche taliane dal 1700 che si è mantignude fin in dì di vuê; in pratiche, il toponim cu la zonte dal sufìs -ščak, scrit -szach). Par esempli, tal 1785 Andreas Massera, dictus Muruszach de Masseris (Libri dai muarts di San Pieri). Ai 22 di Zenâr dal 1777 Thomas filius Georgij Massera de Masseris si maride cun Marina filia Vrbani Loszach de Starmiza e al va a vivi, tant che zinar, te cjase de nuvice a Stermize. Tommaso Massera al è facil che al vignìs de famee dai “Ručkini" che e vîf in localitât Múrove di Masseris e, a Stermize, lu à acompagnât il so sorenon Murúszach. Achì par solit lu clamavin cul sorenon e il plevan di San Pieri, regjistrant i batisims dai fîs di Tommaso, al à cambiât il cognon origjinari dal pari (Massera) cul sorenon (Muruszach) che, cussì, al à cjapât sù la funzion di cognon (die 3 maji 1786 Josephus filius Thomae Muruszach de Starmiza Montis Majoris). Dal microtoponim Múrove al è nassût, simpri a Masseris, ancje il sorenon Múrovaz “cui che al è a stâ te localitât Múrove " (1785 Antonius Massera dictus Murouaz de Masseris), che però al è sparît adore e che aromai si è pierdût il so ricuart (Zuanella, Dom, 1, 1999).