Al sarà stât, in origjin, il sorenon di une persone che e produseve o che e vendeve cjarbon. Cognon presint a Glemone tal Tresinte: tal 1391 si batie culì Iacoba filia Danielis dicti Carbon fabri. O cjatìn ancje Daniele Carbone tal 1439 e Battista Carbone tal 1475, ripuartâts tant che cjamerârs dal Ospedâl di S. Michêl di Glemone, e Antonio Carbon tal 1439 e Prospero Carboni tal 1485, ripuartâts tant che cjamerârs de glesie di S. Marie Maiôr di Glemone. Tal 1443, simpri ta chê citadine, si batie Caterina filia Antoni Carboni; dal 1442 al 1462 a son ripuartâts ancje Leonarda uxor Antoni Carboni tant che santule e Antonius Carboni tant che santul intun pôcs di batisims. Tal “rottolo” (rodul) di S. Marie dal 1431, Leonarda femine di Antonio Carboni e paie 62 denârs par une cjase cu lis sôs pertinencis, a son ancje ripuartâts tant che confinants Daniele Carboni e Antonio Carboni (Decio Tomat, inf. pers.). Pal Venit e pal Trentin Rapelli 1995 al ripuarte i nons di persone medievâi Carbone e Carbogno: chescj a derivin de vôs carbone “cjarbon” che e indicave une persone che e produseve o che e vendeve chest combustibil, ma soredut une persone cu la piel di colôr scûr o ben cui voi o cui cjavei neris come il cjarbon. In cualchi câs il cognon al pues forsit derivâ di Carbone, non dal bufon dal re Libanore te liende epiche di Uggieri il Danês. Tal Schedari Corgnali: 1326 Paulo Carbono de Glemona; 1344 Joh. Carbonello a Feagne; 1355 Marcellinus Carbonus de Glemona; 1426 Joh. Carboni a Torean. Si lu cjate a Gurize, Çarvignan, Udin.

Al vignarà dal non di un mistîr, o di un microtoponim "lûc dulà che si prodûs il cjarbon", o di Carbonera, un centri abitât te provincie di Trevîs. Al è un cognon difondût a San Vît dal Tiliment, Codroip, Morsan da lis Ocjis, Lignan. Tal 1755 Pietro Carbonera, meriga di Gaiarine (ASU CRS 225/1).