SuperDizionari

biliet s.m.
(bi-liet)

Piçul toc di cjarte cun sù scrit un messaç, une note o sim.

sinonims

sfueut

esemplis

"al spietave cul cûr in man i biliets che [so fi] i scriveve de Grecie, e i rispuindeve subit letaris lungjis"

gjavât fûr di "Dreute" di Riedo Pup

"si passavisi cualchi biliet di scuindon, indulà che si veve scritis chês robis che no si rivave a dîsi"

gjavât fûr di "Otavari a Madone" di Meni Ucel

Viôt ancje: bilgjet

biliet s.m.
(bi-liet)

Toc di cjarte o ancje di altri materiâl, stampât, che al documente il dirit di jentrâ in ambients, di lâ a viodi spetacui, di viazâ su mieçs di traspuart e v.i.

sinonims

jentrade

esemplis

"un spetacul che al meretave paiât il biliet par jentrâ a viodilu"

gjavât fûr di "Lis predicjis dal muini" di Josef Marchet

"Lui partiva ogni sabida dopomisdì cul treno da lis cuatri e ogni volta viodeva chê signorina, che comi lui cjoleva il biliet par Gurissa, par lâ e tornâ"

gjavât fûr di "Olga, se enigma" di Ranieri Mario Cossâr

biliet s.m.
(bi-liet)

Il sfueut numerât par partecipâ a di une lotarie, pescje e v.i.

esemplis

"dute la int i domandave de fieste e de pescje e si lamentave dal stragjo dai biliets blancs. Pre Pitin, cuntune impuartance osteade, ur spiegave che il bonsignôr al veve lui i biliets bogns e nol voleve metiju dentri tal bussulot"

gjavât fûr di "Pre Pitin" di Antoni Beline

biliet s.m.
(bi-liet)

Cjarte monede

sinonims

biliet di bancje, cjarte, cjarte monede, sfuei

esemplis

"[il diretôr de bancje] al tacave a contâ i macuts di biliets e il contabil a plaçâju te cassefuart"

gjavât fûr di "La rambe" di Fabian Ros

"nasâ il profum dai biliets di cent"

gjavât fûr di "Donald dal Tiliment" di Stiefin Morat

monolengâl