Hai cercato la parola
monolingue
Torna indietro

monolingue

borse s.f.
(bor-se)
Sorte di contignidôr di diviers materiâi, tant che tiessût, piel, plastiche, cjarte, par meti e puartâ robe di cualsisei gjenar, ancje in riferiment gjeneric a sacs, russacs, valîs, cartelis e v.i.
sinonimi
sporte
esempi
"une siorute che e çueteave indenant cu la borse di plastiche plene di spese e spià cun suspiet chei trê frutats"
da "La salamandrie tal fûc" di Carlo Tolazzi
"e tirà fûr di un scansel une borse e je strucjà tes mans che si implenarin di bêçs"
da "Sul agâr" di Pieri Menis
"e tornà cuntune borse di fibre maron, di chês che a dopravin i scuelârs agn indaûr. Le poià su la taule, dopo di vê tirât fûr un mac di cjartis"
da "Prime di sere" di Carlo Sgorlon
borse s.f.
(bor-se)
Contignidôr, di diviersis formis e dimensions, sedi cun funzion pratiche di puartâ alc, sedi cun funzion di acessori di mode, soredut feminine
sinonimi
borsete
esempi
"se jo o ai une borse di une marcje esclusive, jo (ancje idealmentri) o riten di partignî a un ciert grop sociâl"
da "Comunicâ la autonomie" di Sandri Di Suald
borse s.f.
(bor-se)
Cuantitât o disponibilitât o ûs di bêçs (fig.)
sinonimi
tacuin
esempi
"in chê cjase ducj cîr di raspâ e mai di puartâ dongje, e in chest mût si suie ancje la borse dal Manin"
da "La tiere di Lansing" di Maria Forte
"un messaç indreçât aes istituzions par che a vierzedin la borse par judâ un mieç di interès public"
da "Un Friûl difarent: i 90 mhz di Onde Furlane" di Max Mauro
borse s.f.
(bor-se)
(anat.) Struture anatomiche a forme di sac
borse s.f.
(bor-se)
Spec. tal pl., forme sglonfe e flape de piel sot dai voi (fig.)
esempi
"si palpave i voi mieç distudâts daûr lis borsis di piel ruane"
da "La aghe da pît la cleve" di Dino Virgili
borse s.f.
(bor-se)
Cuantitât di bêçs destinâts a une persone tant che compens, premi e sim.
esempi
"i partecipants a vevin dirit a un premi di partecipazion e, cun di plui, la pussibilitât di vinci une buine borse di bêçs"
da "Adalt abàs" di Stiefin Morat
"potenziâ i assegns di ricercje, lis borsis di dotorât e altris iniziativis"
da "Interviste a Alberto Felice De Toni" di Carli Morandin
borse s.f.
(bor-se)
(bancj.) Ancje cun iniz. maiusc., marcjât public sot control dal stât par tratâ azions, marcjanziis e v.i.
esempi
"une aziende che e ven cuotade in Borse e à l'oblic statutari di fâ vuadagn"
da "Fevelâ di mancul, fâ di plui e fevelâ par furlan" di Christian Romanin
proverbi
"al vâl plui un bon consei che no une borse di bêçs"
"bisugne menâ il dint daûr la borse che si sint"
"bisugne misurâsi seont la borse"
"bon pe bocje, trist pe borse"
"cui che al bastone la femine, al bastone la borse"
"cui che al fale di cjâf al paie di borse"
"cui che al mint la sô borse lu sint"
"cui che nol à bêçs te borse che al vedi mîl in bocje"
"il grant vuadagn al sfonde la borse"
"il mâl de piere al suie la borse"
"il masse interès al sfondere la borse"
"il trop vuadagn al sfondere la borse"
"la femine e je il paradîs dal cuarp, il purgatori de borse, l'infier da la anime"
"larc di bocje, strent di borse"
"lis feminis a son il paradîs dal cuarp, il purgatori de borse e l'infier da la anime"
"o mîl in bocje o bêçs in borse"
"pôc e spes al jemple la borse"
"se il timp al è seren, ancje cu la borse flape si sta ben"
"tal paîs dai laris la man su la borse"
Torna in Cima