SuperDizionari

câs s.m.

Fat che al sucêt cence jessi volût o spietât

sinonims

fatalitât, truc, vicende, fat

esemplis

"[Pauli] al è lât a urtâ daprûf di un camion [...] o soi rivât sul puest un moment dopo che al jere sucedût il câs"

gjavât fûr di "Lis predicjis dal muini" di Josef Marchet

"mi fevelave dai câs de sô vite strussiade"

gjavât fûr di "Mê none Miute" di Lucio Perès

"al è un câs, o forsit ancje no, che la crisi e coli intal moment storic che al viôt mudâ la gjeografie e la politiche di mieç mont"

gjavât fûr di "Un Friûl difarent: i 90 mhz di Onde Furlane" di Max Mauro

câs s.m.

Fat straordenari o pôc usuâl

esemplis

"[par lâ a sgliciâ] il suei difûr al jere un pôc masse lontan par nô, mularie dal borc disot; e po al jere un câs che al deventàs dut une lastre"

gjavât fûr di "Tal Cuar" di Lucio Perès

câs s.m.

Fat esemplâr di un ciert fenomen

esemplis

"si pues vê iniment la Scola ladina de Fascia, che al è un câs di sucès là che, tal zîr di un pôcs di agns, si è rivâts a inserî la lenghe ladine come lenghe veicolâr"

gjavât fûr di "Scuelis di cualitât e lenghis di minorance. Une riflession su la lenghe furlane intes scuelis" di Mario Dutto

"in chei agns, e jere une gruesse novitât che un sagjist talian al fevelàs dal câs dal Friûl in tiermins di nazion improibide"

gjavât fûr di "Memoriis di politiche linguistiche" di Adrian Cescje

câs s.m.

[CO] (med.) Event patologjic o clinic, situazion specifiche di un pazient che al à une cierte afezion

esemplis

"il miedi al conseà di fâ vignî un altri miedi par une consulte: il câs al jere grâf: o salvâ la mari o salvâ il frut"

gjavât fûr di "A jerin lagrimis" di Pieri Somede dai Marcs

câs s.m.

Fat che al pues jessi investigât, che al pues jessi criminâl

esemplis

"ancje se il câs al jere stât metût in archivi sot la vôs "suicidi" lui nol jere convint e al seguitave a sgarfâ"

gjavât fûr di "Cretevierte" di Roberto Ongaro

câs s.m.

Acjadiment scjassôs, scandul, spec. in cjamp politic o judiziari

sinonims

acjadiment, fat, storie

esemplis

"il president al à vût di dâ lis dimissions par un câs di coruzion"

"cussì di bocje in bocje il câs di Matie Moràs [che al veve vût un amôr disfortunât cu la fie dal paron de fornâs] si sglonfà, si colorì, resentât ta la aghe dal poç, strupiât sot ducj i puartis"

gjavât fûr di "Sul agâr" di Pieri Menis

câs s.m.

Circostance, situazion particolâr

sinonims

spieli, storie, vicende

esemplis

"te inrocade al è l'unic câs che il re si môf plui di une casele"

gjavât fûr di "Zuìn di scacs" di Nilde Teresa Negro

"la ocupazion neolitiche e interesse centenârs di etars (tal câs di Samardencje, i materiâi a son sparniçâts su cirche 600-800 etars di superficie)"

gjavât fûr di "La preistorie in Friûl" di Andrea Pessina, Gaetano Vinciguerra

"une cuistion che e va profondide cun cussience e cun scandais câs par câs"

gjavât fûr di "Guide par un consum just e solidâl" di Buteghe dal Mont, Luche Nazzi

câs s.m.

Ipotesi, pussibilitât

esemplis

"se nol è rivât fin cumò, nol è câs che al vegni"

"metìn il câs che i tiei suspiets a sedin juscj, no bastin, a coventin provis"

câs s.m.

Cause irazionâl fûr dal control uman o ancje cause no cognossude o mancjance di cause

sinonims

fortune, destin, fatalitât, casualitât

esemplis

"lassâ sielzi al câs"

"une part impuartante e je chê dal câs che al lavore su lis mutazions gjenetichis: cualchidune e à sucès, cualchidune no"

gjavât fûr di "Evoluzion umane: la sience e mostre i segrets des nestris origjins" di Claudio Tuniz

câs s.m.

[TS] (ling.) Tes lenghis flessivis e aglutinantis, la forme che il non al cjape par esprimi une funzion sintatiche, o la funzion sintatiche stesse

esemplis

"il latin classic al veve sîs câs: nominatîf, gjenitîf, datîf, acusatîf, ablatîf e vocatîf"

monolengâl