SuperDizionari

chel adi.dim.

Simpri cun daspò il sostantîf che i si riferìs, al segne cdn. o alc lontan tal spazi o tal timp di cui che al fevele; al pues jessi infuarcît o specificât di averbis o locuzions che a van simpri dopo dal sostantîf indicât

esemplis

"che mi disi, dulà menie chê puarte là?"

gjavât fûr di "La rambe" di Fabian Ros

"viôt chê machine li in bande e resone, starlocj!"

gjavât fûr di "Light my Fire" di Franco Marchetta

"viodêso chê cjase di contadin dongje il puint de Manganize?"

gjavât fûr di "La brût" di Catarine Percude

Viôt ancje: achel

chel adi.dim.

Soredut riferît a une part dal cuarp o a alc che si à intor, al pues vê valôr di possessîf di seconde o tierce persone

esemplis

"cjo, jù chês mans, par cui mi âstu cjapade?"

gjavât fûr di "Un pugn di moscjis" di Pieri Somede dai Marcs

"al jere di vuardie su chê alte e lungje montagne cun chês scarpis un fregul largjis e chel vistît che lu parave pôc dal aiar, voluçât però tune mantele"

gjavât fûr di "Just, cence di" di Checo Tam

chel adi.dim.

Cun valôr enfatic, sedi par indicâ cdn. o alc di precîs che cdn. o alc di gjeneric o assolût, esemplâr e v.i.

esemplis

"e dut par chê fete di polente"

gjavât fûr di "I furlans e la blave" di Riedo Pup

"gnot e dì al fo in vore, Diu lu sa par cetant timp, a sbisiâ in chê benedete sachete, che come une risultive e continuave simpri a butâ"

gjavât fûr di "Il solt dal Signôr" di Catarine Percude

"chel maledet di un timp nol vûl metisi a bon e intant ducj i lavôrs si ingrumin"

gjavât fûr di "Resurezion a Pontinie" di Pieri Somede dai Marcs

""Di po, viôt di taponâti ben" "Sì, bon, nol è che al fasi chel frêt""

chel pron.dim.

Cdn. o alc o un pont, un concet e v.i. che al è a pene stât dit o che si è li li par dîlu

esemplis

"la rudine sute no veve lassadis olmis, e chel al jere un ben"

gjavât fûr di "Un piçul particolâr" di Fabian Ros

"tes stradis di fûr vie al dave une vôs al cjaval e chel al cresseve il pas cuntune batude nete tal cidin"

gjavât fûr di "Il Bulo di Crodio" di Maria Forte

chel pron.dim.

Cdn. o alc lontan di cui che al fevele e di cui che al scolte

esemplis

""Ce mont ise chê?" "Chel al è il Curanan" "

"Cui isal chel che al jere cun te? Cui isal chel che o jeris insiemi sul gno cesâr?"

gjavât fûr di "Beput" di Meni Ucel

chel pron.dim.

In secuence cuntune relative, al pues indicâ une persone o une robe in gjenerâl, cence un rapuart di lontanance specific cun cui che al fevele e cun cui che al scolte

sinonims

cui

esemplis

"Jacum, ogni joibe, nol bandonave Udin e chel che al veve bisugne de sô marcjanzie al saveve indulà cjatâlu"

gjavât fûr di "Il mierli" di Angelo Covazzi

chel pron.dim.

In funzion di predicât nominâl, la stesse robe o persone di prime, cun chês stessis carateristichis di prime

sinonims

l'istès, compagn

esemplis

"a Breçà il parc nol è plui chel: i cjastinârs, i laris, i teis, i faiârs a son srarîts"

gjavât fûr di "Vigji Brusin" di Riedo Pup

chel pron.dim.

In costruzions partitivis, cun adietîfs o locuzions adietivâls, al pues ancje indicâ alc di sotintindût o clâr par vie dal contest

esemplis

"cjocolate di chê nere"

"puartinus une butilie di chel bon"

"un tango di chei che ti cjapin il cûr, une di chês musichis che ti segnin come une sgrifade"

gjavât fûr di "Milonghe" di Antescûr

chel adi., pron.

In corelazion o cuintriposizion, sedi ripetût che alternât cun altris dimostratîfs, in particolâ chun "chest"

esemplis

"o chest pierçul o chel o chel altri, tu puedis cjoli ce che tu vuelis, a son ducj madûrs"

chel adi.dim., pron.dim.

Si dopre di preference, tal puest dal articul definît, devant di "altri"

esemplis

"di une bande al viodeve la cassefuart, di chê altre une puarte"

gjavât fûr di "La rambe" di Fabian Ros

"lis grandis oparis a son simpri un afaron di beçons là che pôcs a mangjin, cence preocupâsi des consecuencis te vite di chei altris"

gjavât fûr di "Cuintristorie dal Nûfcent 2000-2010" di Angelo Floramo

monolengâl