SuperDizionari

monolengâl

cjampane s.f.
(cjam-pa-ne)

Strument, spec. di bronç, a forme di vâs ribaltât, sunât cuntun batali o cuntune mace, tipic soredut dai tors des glesiis

esemplis

"a pene che nô mularie o sintivin la cjampane di dutrine, vie di corse in glesie par confessâsi"

gjavât fûr di "Vilie di fieste" di Lucio Perès

"par ogni cjase e svintulave une bandiere; lis cjampanis moladis a plen a sunavin in dopli… la Bande si sfladave"

gjavât fûr di "11 di Fevrâr 1929" di Pieri Somede dai Marcs

"a saludâ chê albe, clare come un voli di uciel, la prime e je stade la cjampane di Mont di Buie, chê che e mandave simpri vie la tampieste, e subit i à dât sot chê di Bueriis che al pareve che e sunàs propit li dabàs, platade te torbere, sot dal linzûl blanc de fumate basse"

gjavât fûr di "Il cuader de none" di Pieri Menis

"la cjampane grande dal tor, sù in alt, e sunave la avemarie e une vongule di pâs e involuçave i mûrs de canoniche, tal scurut de sere"

gjavât fûr di "Ta la ombrene de canoniche" di Pieri Somede dai Marcs

cjampane s.f.
(cjam-pa-ne)

Ce che si sint a dî, informazion, version di cemût che al è sucedût alc (fig.)

esemplis

"spiete prime di judicâ, no tu puedis sintî dome une cjampane"

"se o savessis, ce cjampanis che a sunin sun jê!"

gjavât fûr di "A passe la scalmane" di Anute Fabris

"dome sui fruts lis cjampanis no sunavin ben e a rivavin, di pueste, dopo lis bielis novitâts. I fruts no jerin propit taiâts su la lune dai libris! Ducj i doi impastâts cu la stesse malevoie, che i vignive rabie di sei lôr pari"

gjavât fûr di "La tiere di Lansing" di Maria Forte

cjampane s.f.
(cjam-pa-ne)

Robe che e à une forme di cjampane

esemplis

"da cjâf dal fûc, sot la cjampane nere dal fogolâr, al jere il «trono» dal pari di famee, in cjase di mê mari: un cjadreon cui braçâi e cuntun cûr intaiât te bree dal schenâl"

gjavât fûr di "Il «trono» dal von" di Pieri Menis

cjampane s.f.
(cjam-pa-ne)

Schermi in forme di cjampane che al fâs che la lûs di une flame, di une lampade, di une lampadine e v.i. e sedi mancul fuarte e plui difondude

sinonims

parelum

esemplis

"la cjampane de lum"

detulis

"a vuelin dôs cjampanis par sunâ parie"

"cuant che al sune il campanel, lis cjampanis a àn sunât"

"cuant che lis cjampanis piçulis a sunin, lis grandis a àn sunât"

"cuntune cjampane no si sune parie"

"dulà che a son cjampanis a son ancje putanis"

"la fiere terçane il zovin lu risane e al vieli i fâs sunâ la cjampane"

"la tos paiane o che e risane o che e sune la cjampane"

"tal sun si cognòs lis cjampanis"

"un glon di cjampane al paie ducj"

torne sù