SuperDizionari

conservâ v.tr.
(con-ser-vâ)

Tignî in possès alc, soredut cun responsabilitât, fasint in maniere che al resti in buinis cundizions

sinonims

custodî, tignî

esemplis

"no sai par ce reson che lis autoritâts de glesie o dal guvier no comandin di puartâ vie chês robis di valôr e di metilis in cualchi museu, une volte che la int no à nissune cure di lôr: almancul tai museus al è cui che al sa conservâlis e comedâlis, e ducj po lâ a viodilis e a studiâlis cun comoditât"

gjavât fûr di "Lis predicjis dal muini" di Josef Marchet

conservâ v.tr.
(con-ser-vâ)

Tignî in bande, no doprâ daurman (ancje fig.)

sinonims

tignî, sparagnâ

esemplis

"conservait la vôs e il flât par cuant che o varês plui dibisugne"

gjavât fûr di "La cjase di Toni" di Tarcisio Venuti

conservâ v.tr.
(con-ser-vâ)

Tignî o tratâ la robe di mangjâ in maniere che e duri tant timp o plui timp che si pues cence lâ di mâl

sinonims

tignî, meti

esemplis

"i pastôrs a podevin ancje cjoli sâl, che al covente pes bestiis e par conservâ la cjar"

gjavât fûr di "Protostorie e storie romane in Friûl" di AAVV

"si intindeve ancje di camarins e di cantinis cuant che un camarin nol conservave ben il salam lu clamavin lui a sistemâ i barconuts a tramontan e a buere e a regolâ i aiars"

gjavât fûr di "I furlans e il mestri" di Riedo Pup

"lis cuessis di purcit a vegnin selezionadis e netadis. 24-48 oris dopo a vegnin cuviertis di sâl (tant che a son i chilos di pês) e conservadis a une temperadure jenfri 0 e 4°C"

gjavât fûr di "Un persut unic par un lûc unic" di Oscar Puntel

conservâ v.tr.
(con-ser-vâ)

Tignî in buine salût

sinonims

vuardâ, mantignî, salvâ

esemplis

"come predi, no ai mai mancjât di preâ e fâ preâ che il Signôr nus conservi i nestris Sovrans Imperiâi"

gjavât fûr di "Int di masnade" di Alviero Negro

conservâ v.tr.
(con-ser-vâ)

No pierdi une cualitât, une atitudin e v.i. (fig.)

sinonims

tignî, mantignî

esemplis

"Fredo Migot, ancje di vecjo, al veve conservât la sô legre vene di spirt gjubiâl e ecuilibrât"

gjavât fûr di "Murî di fam cui camarins plens" di Riedo Pup

conservâ v.tr.
(con-ser-vâ)

Vê ancjemò une posizion, une situazion, une prerogative sociâl, professionâl, economiche, culturâl, linguistiche e v.i. (fig.)

sinonims

tignî, mantignî

esemplis

"la nobiltât e conservave la sô preminence tal Parlament e chest al deventave un istitût esecutîf dal gnûf guvier"

gjavât fûr di "Cuintristorie dal Friûl fin sot la Italie" di Josef Marchet

"ancje la produzion artistiche di chescj secui e à conservade une muse unitarie dute sô, massime te Rinassince cuant che la art e la culture furlane a àn sflorît cualchidune des miôr creazions dal lôr gjeni"

gjavât fûr di "Storie dal popul furlan" di Gian Carlo Menis

"la Olande e je nassude sui ultins dal '500 come federazion di stâts libars e ancjemò e conserve un ordenament autonomistic"

gjavât fûr di "Trê salts tal scûr: costituzion - republiche - autonomie" di Josef Marchet

"cierts stâts a varan la preocupazion a mantignî la superioritât militâr convenzionâl des grandis potencis mondiâls e altris a ciraran altris manieris di conservâ la lôr posizion atuâl tal sisteme internazionâl"

gjavât fûr di "Un mont cence armis nucleârs. Sfidis sientifichis e tecnologjichis" di Alessandro Pascolini

monolengâl