SuperDizionari

monolengâl

continui adi., s.m.
(con-ti-nui)

Che no si ferme, che al va indenant tal spazi, tal timp, che al manten une azion, une carateristiche e v.i.

sinonims

cence padin, cence polse, continuât, eterni, filât, fis, indurant, insistent, permanent, perpetui, persistent, restîf, salt, seguitîf, spes, sprolungjât, stabil

esemplis

"chê azion e je stade, e no podeve no sei, une bataie continue, che o ai pierdude, ma che o tornarès a scombati pas su pas se o ves di tornâ a scomençâle"

gjavât fûr di "Memoriis di politiche linguistiche" di Adrian Cescje

"alc che no saveve spiegâsi. Une continue spiete di un reful di novitât che al mudàs il drandran, ma ce?"

gjavât fûr di "Cretevierte" di Roberto Ongaro

"chest procediment di disfredament, mancjant un poç termic esterni, al à puartât a un aument continui de temperadure e de pression te struture primarie di contigniment"

gjavât fûr di "Il disastri de centrâl nucleâr di Fukushima Dai-ichi" di Alessandro Pascolini

Viôt ancje: continuo

continui adi.
(con-ti-nui)

Che al torne a sucedi dispès

sinonims

continuât, fis, salt, seguitîf, stabil

esemplis

"tal 1252 al tacà a Vençon un marcjât setemanâl che al deventà motîf di contrascj continuis cun Glemone"

gjavât fûr di "La culine furlane" di Luigina Di Giusto, Andrea Guaran e Mauro Pascolini

continui adi.
(con-ti-nui)

(mat.) Di funzion, che e je definide su doi spazis topologjics, tâl che la cuintriimagjin di ogni intor di f(x) e je un intor di x

continui adi., s.m.
(con-ti-nui)

(filos.) Inte filosofie aristoteliche, che al è fat di elements che si pues simpri dividiju

continui adi., s.m.
(con-ti-nui)

(fon.) Di sun, che al pues vê une articolazion plui lungje, par esempli intes vocâls

detulis

"fiere continue e cope cjavai"

"la gote continue e sbuse la piere"

"la gote continue e svuede il vassiel"

torne sù