SuperDizionari

contrari adi.
(con-tra-ri)

Che al è in oposizion a alc o a cdn., che al è cuintri

sinonimi

aviers, contrastant, in oposizion, lontan, opuest

esempi

"si jerin formadis ideis che, dade la diversitât dai doi caratars, a finirin par deventâ contrariis"

da "La cjase di Toni" di Tarcisio Venuti

Vedi anche: contrâr

contrari adi., s.m.
(con-tra-ri)

Che, cui che intune decision, intune votazion, intun confront al è cuintri di une posizion, di une propueste, di une persone e v.i.

sinonimi

aviers, ostîl

esempi

"umigns libars a pensin che si devi rivâ adore di vê un mont libar, cence “stangjis” e par chest a son contraris a dutis lis rivendicazions nazionâls "

da "Moviment Autonomist Furlan pe Federazion dai Popui" di Josef Marchet

"il nestri comun al jere metût tal numar di chei che a vevin int contrarie al Duce"

da "Lis votazions" di Pieri Somede dai Marcs

contrari adi.
(con-tra-ri)

Che al è intune posizion oponude, che al va ta chel altri sens

sinonimi

aviers, denantdaûr, ledrôs, ruviers, cuintri

esempi

"al vignive indenant biel planc, par vie de buere che e soflave contrarie"

da "Prime di sere" di Carlo Sgorlon

"si jevà sù e ancje lui al le a poiâsi su la bancje, ma de bande contrarie, in face di Catine"

da "Trê feminis" di Gianni Gregoricchio

contrari adi.
(con-tra-ri)

(logj.) Di dôs proposizions universâls, che a àn sogjet e predicazion compagns, ma une e je negative e chê altre afermative

contrari s.m.
(con-tra-ri)

Ce che al è cuintri, che al è in oposizion, che al corispuint a alc ma in cuintri

sinonimi

incontrari, ledrôs, opuest

esempi

"si podarès cuasi riscjâ une propueste: conseâ i letôrs delicâts di fâ il contrari di ce che a stan fasint: invezit di nissun gjornâl, leint invezit une vore"

da "Il partît dai zovins coscrits" di Riedo Pup

"lis lôr ideis a son une il contrari di chê altre"

"nissun ancjemò nol è stât bon di mostrâ il contrari: al plui cualchidun si è contentât di sentenziâ di no, cence nissun resonament"

da "Cuarde e savon" di Josef Marchet

contrari s.m.
(con-tra-ri)

[CO] (ling.) Peraule di significât contrari a une altre

esempi

"un dizionaris cun sinonims e contraris"

"la peraule 'umiltât' e je il contrari de peraule 'supierbie'"

contrari s.m.
(con-tra-ri)

Situazion negative, soredut se no je casuâl o se no dipent di cui che le patìs

esempi

"ogni tant si pues dome che sopuartâ i contraris de vite"

monolingue