SuperDizionari

cuasi av.
(cua-si)

Par indicâ che une azion, une situazion, une afermazion e v.i. no je finide, complete, assolude e v.i. ma i mancje pôc o e je aprossimade

sinonimi

dibot, va e no va

esempi

"al tirave fûr dal scansel il libri neri dai «Uficis»: vecjon, cui ponts grues, che lui lu saveve cuasi dut ad a ment"

da "Zuan Jeremie" di Riedo Pup

"intal 1420 la Republiche di Vignesie e rive a concuistâ il stât patriarcjâl furlan, ma par cuasi un secul la sô autoritât e reste malsigure "

da "Il Friûl de Joibe Grasse dal 1511" di Carli Pup

"cuasi tal mieç dal Cjanâl di sant Pieri, parsore la vile di Çurçuvint, si viôt une montagne verde che i disin la Tencje"

da "Lis striis di Gjermanie" di Catarine Percude

Vedi anche: scuasi, scuasit, scuasin, scuasint

cuasi av.
(cua-si)

Ancje ripetût, par pandi dubi o par morestâ une afermazion

sinonimi

vadì, va e no va, dibot

esempi

"il plevan, cu la sô teolighe, le presentave simpri tune maniere tâl che, cuasi cuasi, la int si convinceve che a 'nd jere stade parfin pocje tampieste daûr i merits dai blestemadôrs de parochie e dai pecjadats di carnevâl"

da "I furlans e la religjon" di Riedo Pup

"- Ancje i Clevis a patissin! - a disevin la int, e cuasi cuasi a vevin un gust di triscj dentri dal cûr inmò"

da "La aghe da pît la cleve" di Dino Virgili

cuasi av.
(cua-si)

Subite prime di un verp, par indicâ che alc al podeve jessi, ancje se nol è stât

sinonimi

a moments, mancje pôc che, negozi che, va e no va, dibot

esempi

"sâr Tite infervorât, plen di vinace / l'ingrampe il so compagn, e furiôs / i mene a braçs aviarts, cuasi lu mace"

da "Cjase di Dalban" di Maria Forte

"e finìs cussì la letare che Dolfo al cjate sul dentri de puartele dal armâr, plantade tal len cuntun curtìs, che cuasi i veve batût tal cerneli, cuant che le veve vierte"

da "Contis sot spirt" di Raffaele Serafini

cuasi coniun.
(cua-si)

Par introdusi une comparazion

sinonimi

come, tant che, come che, come se

esempi

"i va dongje cuasi a sfidâlu cuntune ufiarte"

da "L'anel striât" di Bruno Paolo Pellarini

monolingue