SuperDizionari

efiet s.m.
(e-fiet)

Ce che al derive di une cause, di un procediment, di un sfuarç e v.i.

sinonims

conclusion, costrut, esit, risulte

esemplis

"la cafeine e la cocaine, a dan ecitazion propit parcè che a incressin i efiets de noradrenaline sul cerviel"

gjavât fûr di "Il cjâf dai furlans" di Franc Fari

"il prin efiet dal riscjaldament al è chel di sfantâ un pôc a la volte, tal câs che a sedin, nûi, fumatele e fumate"

gjavât fûr di "Notis di meteorologjie pal Friûl - Vignesie Julie" di Stefano Micheletti, Marcellino Salvador

efiet s.m.
(e-fiet)

Influence su lis percezions sensoriâls, che e pues ancje ingjanâ

esemplis

"forsit al jere l'efiet des lûs che a marchin lis ombris"

gjavât fûr di "I forescj" di Alan Brusini, Gian Paolo Linda

"la lune, par un efiet otic, e someave che e corès, cuant che invezit a cori al jere il nûl"

gjavât fûr di "Gjoldiments forescj" di Checo Tam

efiet s.m.
(e-fiet)

Reazion emotive o inteletive che si prodûs in cdn.

sinonims

impression

esemplis

"Tite si fermà par viodi l'efiet che lis sôs peraulis a vevin fat sul fantat"

gjavât fûr di "Il muc" di Roberto Ongaro

"jessi metûts dongje di Pasolini, Saba e Caproni al fâs un ciert efiet"

gjavât fûr di "Interviste a Pierluigi Cappello" di Walter Tomada

"a tancj comissaris l'argoment de tradizion storiche al veve fat un bon efiet"

gjavât fûr di "Memoriis di politiche linguistiche" di Adrian Cescje

efiet s.m.
(e-fiet)

[TS] (sport) Rotazion dade al balon o ae bale cuntun colp di tai par fâi fâ une traietorie curvade particolâr

sinonims

zîr

esemplis

"dâ l'efiet ae punizion par passâ in bande de bariere"

efiet s.m.
(e-fiet)

[TS] (sient.) Fenomen che si studie in maniere sientifiche, dispès specificât di une denominazion o ancje cul non di cui che lu à scuviert o esplicât

esemplis

"i efiets osservâts a vignivin alore interpretâts in “mût aristotelic”"

gjavât fûr di "La invenzion dal vueit inte lampadine di Turo Malignani. Storie, gnovis ipotesis e atualitât" di Lorenzo Marcolini

"a nivel neurobiologjic si è viodût che l'efiet placebo al è leât ae liberazion intal cerviel di opioits naturâi, endocanabinoits e dopamine"

gjavât fûr di "Neurosiencis dal dolôr" di Franc Fari

efiet s.m.
(e-fiet)

Spec. tal pl., ogjet di une persone o di furnidure di un puest

esemplis

"si fermarin dongje di un taulon li che al podeve viodi une borsete cun sparniçât daprûf dut il contignût. L'ispetôr i domandà se al ricognosseve chei efiets"

gjavât fûr di "Un piçul particolâr" di Fabian Ros

monolengâl