SuperDizionari

forme s.f.
(for-me)

Aspiet esterni di alc, determinât massime dal contor de superficie e dal volum

sinonims

difûr, fate, figure, inficje, linie, sacume, stamp

esemplis

"Toni al zirà ator di chê grande struture fin a cjatâ une puartele a forme di retangul"

gjavât fûr di "Il palaç" di Checo Tam

"la Tiere le viodei dal alt, cun dutis lis formis dai continents"

gjavât fûr di "Sense" di Checo Tam

"le cjalave dentri di sè e al restave moments incjantâts a cirî la plee de sô bocje, la forme dal so cerneli e il tai dai voi"

gjavât fûr di "Il Bide di Miot" di Maria Forte

forme s.f.
(for-me)

Tal pl., aspiet dal cuarp, spec. di une femine

sinonims

cuarp, linie, figure, inficje

esemplis

"e stave ben atente che lis sôs formis no fossin masse in evidence, ancje se, dentri vie, no i displaseve di jessi cussì"

gjavât fûr di "Ombris tal infinît" di Carlo Sgorlon

forme s.f.
(for-me)

Aspiet, aparence

sinonims

aparence, aspiet, fate, figure, inficje, mostre, sacume, stamp

esemplis

"a contavin di una storia scura, di un che al si era copât e al compariva in forma di cjara rossa"

gjavât fûr di "La strada di chel âtri mont" di Novella Cantarutti

forme s.f.
(for-me)

Gjenar di struture, maniere di articolâsi di une realtât

sinonims

fate, inficje, sorte, stamp, stîl, tressadure, configurazion

esemplis

"i Celtics a jerin dividûts in putrops grops, che si guviernavin in forme republicane, plui di râr in forme di piçulis monarchiis"

gjavât fûr di "Cuintristorie dal Friûl fin sot la Italie" di Josef Marchet

"la materie prime plui conveniente [...] par movi lis machinis intes fabrichis, lis nâfs intal mâr e lis locomotivis al jere il cjarbon, o miôr la sô forme alotropiche clamade stancol"

gjavât fûr di "La invenzion dal vueit inte lampadine di Turo Malignani. Storie, gnovis ipotesis e atualitât" di Lorenzo Marcolini

forme s.f.
(for-me)

Categorie, grup di sogjets o elements che a àn chês stessis carateristichis

sinonims

specie, sorte, fate, gjenar

esemplis

"la nestre storie evolutive e començà cui bateris, lis primis formis di vite comparidis su la Tiere 3,8 miliarts di agns indaûr"

gjavât fûr di "Evoluzion umane: la sience e mostre i segrets des nestris origjins" di Claudio Tuniz

forme s.f.
(for-me)

Maniere che si fâs une azion

sinonims

fate, mût, maniere, sisteme, vie

esemplis

"par sierâ il bec a une spie [...] lis formis no son tropis, anzit a 'nd è une sole, la ultime e cence apel: la muart"

gjavât fûr di "Il muc" di Roberto Ongaro

"e patafave un so fi fûr di mût: une furie. Le viôt Pieri, si ferme e i dîs: «Ma parcè po, Mariute, i dâstu in chê forme a chê puare creature?»"

gjavât fûr di "Gjalinis" di Meni Ucel

"al è impuartant che, in forme progressive e cun atenzion al cuadri gjenerâl, si ledi a superâ il sisteme de autocertificazion cun chel de certificazion obietive "

gjavât fûr di "Relazion dal Grup di lavôr “Planificazion linguistiche”" di Donato Toffoli

forme s.f.
(for-me)

Stîl espressîf

sinonims

ande, fate, maniere, mût, stîl

esemplis

"[Otmar Mainardis] un inteletuâl fin e salvadi, difûr dal svolâ e stramudâsi dal timp, isolât ma ancje inlidrisât fin tal cûr de realtât furlane, che al sielç une forme poetiche fûr dal timp"

gjavât fûr di "Otmar Mainardis" di Sandri Carrozzo

forme s.f.
(for-me)

Scheme, struture di componiment leterari o musicâl

sinonims

implant, maniere, mût, struture

esemplis

"las cjançonetas a no son poesias - encje se la poesia a po ficjâsi denti intuna cjançoneta - ne a àn di vê forma di poesia, ma propit forma di cjançonetas"

gjavât fûr di "In forma di peraulas..." di Giorgio Ferigo

forme s.f.
(for-me)

Rispiet des normis di compuartament acetadis par convenzion tes relazions sociâls

sinonims

ce che al covente, ce che si dîs, creance, difûr, educazion, finece

esemplis

"dî, si pues dî dut, ma cuntun pocje di forme"

forme s.f.
(for-me)

Esterioritât, ce che si viôt di alc, dispès in contraposizion in complement cun ce che al è e ce che al fâs

sinonims

aparence, difûr, façade, muse, scusse

esemplis

""La plovisine": une des lirichis tra lis plui cognossudis di chest autôr [Pieri Çorut], dulà che o cjatìn ispirazion, espression, contignût e forme"

gjavât fûr di "Pieri Çorut" di Roberto Jacovissi

"lis direzions dai moviments autonomistics a àn di pensâ a cheste pussibilitât [un coordenament tra regjons di confin] pacifiche te forme, ma formidabile te sostance"

gjavât fûr di "E se no nus dassin la autonomie" di Josef Marchet

forme s.f.
(for-me)

Cundizion psicofisiche di une persone, spec. di un atlete

sinonims

cundizion, stât

esemplis

"sul tacâ dal campionât tancj zuiadôrs no son ancjemò te miôr forme"

forme s.f.
(for-me)

[TS] (filos.) In Platon, essence, cause, carateristiche inteligjibile e concetuâl des cjossis materiâls, idee

sinonims

categorie, concet pûr, forme struturâl, idee, struture

forme s.f.
(for-me)

[TS] (gram.) Aspiet morfologjic di un tiermin

esemplis

"par solit il leme di une forme nominâl e je la forme dal nominatîf singolâr; il leme di une forme verbâl al è l'infinît dal verp in cuistion e v.i."

gjavât fûr di "Corpus linguistics" di Vladimir Petkevic

forme s.f.
(for-me)

[TS] (gram.) Variante lessicâl di peraule

esemplis

"ancje «braç», tal furlan di in dì di vuê, daprûf dal plurâl «braçs», al à la forme «bracis»"

gjavât fûr di "Cualchi ipotesi sul furlan di prin di scrivilu" di Zorç Cadorin

"dutis lis formis furlanis de peraule "nêf" (nêf, nef, neif, niof, ... )"

gjavât fûr di "Presentazion DOF piçul" di Zorç Cadorin

forme s.f.
(for-me)

[TS] (dir.) Rispiet des regulis inte redazion dai ats o dai contrats, di mût che a puedin vê rilevance juridiche

forme s.f.
(for-me)

[TS] (biol.) Stadi di svilup, massime tai animâi che a àn fasis di cressite ben distintis

sinonims

fase, stadi

forme s.f.
(for-me)

Model par lavorâ cuntune cierte dimension e une cierte linie e cun ciertis carateristichis o dâ une cierte forme a materiâi, sostancis, tiessûts e sim.

sinonims

model, piece, stamp, stampon

esemplis

"il cjaliâr al met il corean su la forme"

forme s.f.
(for-me)

Toc intîr di formadi

sinonims

piece

esemplis

"e leve a vendi tal marcjât, jù, te Basse, par tornâ sù, te Alte, cuntune forme o dôs di formadi, un doi o trê salams nostrans e un butilion di vin di chel bon"

gjavât fûr di "L'om che al pierdeve pinsîrs pe strade" di Fabian Ros

monolengâl