SuperDizionari

implantâ v.tr.
(im-plan-tâ)

Meti inte tiere une semence o une plantute o ancje une culture par che e cressi

sinonims

impastanâ, pastanâ, semenâ, plantâ

esemplis

"sot dal miluçâr e ator ator o vevi implantadis cuatri o cinc rosis"

gjavât fûr di "La scuele dai fornasîrs" di Pieri Menis

"a era Maria Sabaa uì di là che a implantava patati"

gjavât fûr di "La Santa" di Novella Cantarutti

implantâ v.tr.
(im-plan-tâ)

Fâ jentrâ alc in alc altri, in mût che al jentri ben indentri, che al stedi dret o che al stedi fis

sinonims

cjaçâ, cjalcjâ, ficjâ, impirâ

esemplis

"lis ruedis si infondin tal savalon, a lassin daûrsi dôs cjaradoriis lungjis come une ferade. I cjavai a implantin lis talpis fin avuâl dai sghirets"

gjavât fûr di "La aghe da pît la cleve" di Dino Virgili

implantâ v.tr.
(im-plan-tâ)

Cui stes significâts di "meti", ma cun valôr plui fuart (fig.)

sinonims

meti, sgnacâ, poiâ, plantâ, ficjâ

esemplis

""[...] vûstu capîle di jessi plui trist! O âstu di spietâ che i aversaris ti implantin il comedon tes cuestis par capîlu?""

gjavât fûr di "Donald dal Tiliment" di Stiefin Morat

implantâ v.tr.
(im-plan-tâ)

Dâ principi, fâ scomençâ une azion, une ativitât, un sisteme, un fenomen e v.i.

sinonims

inviâ

esemplis

"no son i autonomiscj furlans che e pretindin di implantâ une autarchie regjonâl; a son i aversaris che a fasin fente di cjapâle di chê bande par vê cualchi rimpin cuintri di nô"

gjavât fûr di "Fevelâ par dibant" di Josef Marchet

"Toni Fornasarig, il prin che al implantà une industrie de cjadree a Manzan intal 1891"

gjavât fûr di "Viaç a strichis te storie di Manzan" di Laurin Zuan Nardin

"meteitsi a taulin, / implantait la partide e scomencìn"

gjavât fûr di "Pes gnocis Latis-Venture" di Pieri Çorut

implantâ v.tr.
(im-plan-tâ)

Lassâ a la improvise cdn. o lâ vie a la improvise di un puest o ancje di une situazion, di une cundizion e v.i. (fam.)

sinonims

molâ, lassâ, bandonâ, plantâ

esemplis

"la gortane confusionade a implante la revendiule cuntun "Lait a fâsi frizi!""

gjavât fûr di "Al marcjât di Vile" di Luigi Gortani

implantâ v.tr.
(im-plan-tâ)

In sens une vore larc, fâ alc, in gjenar cun decision, cun risultâts incisîfs e v.i. (fig.)

esemplis

"[i malâts] se la muinie no jere, a implantavin une balfuerie tra di lôr tirantsi lis cuzinis e ogni folc che ur vignive tes mans"

gjavât fûr di "Il malât di Cime Undis" di Alan Brusini

monolengâl