SuperDizionari

indenant av.
(in-de-nant)

De bande che si cjale o che si va, te posizion o te direzion che e je in face de persone che e fevele o de persone o robe che e costituìs il pont di riferiment

sinonimi

indevant, devant, denant

esempi

"il predi, vieli e pleât indenant, al lave sù pe androne"

da "Il fi de Rosse" di Pieri Menis

"i ôcs ur zigavin di rassanâts, cul bec indenant, viert di fâ pôre"

da "I ôcs di Miute" di Maria Forte

indenant av., adi.inv.
(in-de-nant)

In posizion di vantaç o plui alte o prime intune classifiche

sinonimi

indevant, devant, denant, adalt, sù

esempi

"al à finît la gare indenant, tra i prins dîs de classifiche finâl"

indenant av.
(in-de-nant)

Tal timp passât o che al ven prime di un ciert moment

sinonimi

prin, prime, devant, denant, indevant

esempi

"al sarès stât un delit chel di pierdile a mone vie cence un tentatîf indenant"

da "Prioritâts" di Meni Ucel

"il guvier basc al à decidût di spostâ di un an indenant la jentrade in vore dal decret"

da "Paîs Basc: nuie multis pes aziendis che no rispietin i dirits linguistics" di Carli Pup

indenant av., adi.inv.
(in-de-nant)

Tal timp futûr o che al ven dopo di un ciert moment

sinonimi

dopo, daspò, daûr

esempi

"i doi si inviarin cence che nissun si scomponès par lôr. Ma cualchi dì indenant, i menaus che a passavin par là a faserin une scuvierte"

da "I pagans di Muine" di Josef Cjargnel

"ma a na fo na flaba un pô di meis indenant, cuant che jê a sa lu cjatà via pai Priecs, tal mieç dai cjamps di sorc: «Adès mo i ti ai ve, santa Lussia, i ti ai e i na tu mi scjampi»"

da "La passion di Donât Ramaç" di Novella Cantarutti

"si veve di meti in bande i rancûrs e di cjalâ indenant"

da "Faliscjis" di Cristina Noacco

indenant av.
(in-de-nant)

In complements di lûcs o di timp, par segnâ un tiermin di inizi

sinonimi

indevant, inlà

esempi

"intal 2006 la Zornade Furlane dai Dirits e je stade cjapade sù ancje di Radio Onde Furlane che, di chel an indenant, e à decidût di fâ deventâ i 27 di Fevrâr une dì di fieste"

da "Zornade Furlane dai Dirits numar 5" di Carli Pup

indenant adi.inv., av.
(in-de-nant)

Che al è za tacât e in part passât

sinonimi

plen, profont, tart, indevant

esempi

"nol veve vût, nancje timp, il paron todesc, di cjatâ un capuçat di mistîr, parcè che la stagjon e jere indenant"

da "La tiere di Lansing" di Maria Forte

"la gnot e je indenant. Intes garetis, i Cosacs a fasin la vuardie e a tegnin bot ae sium"

da "Storie di Min" di Ivano Urli

indenant adi.inv., av.
(in-de-nant)

Dongje de conclusion, de realizazion e v.i.

sinonimi

a bon pont, indevant

esempi

"al è in bal ancje un progjet, aromai une vore indenant, par fâ une postazion telescopiche"

da "Osservatori Astronomic di Talmassons" di Gloria Angeli

indenant adi.inv., av.
(in-de-nant)

Che al è o che al fâs alc in anticip

sinonimi

indevant, prin, prime

esempi

"o soi un an indenant. O ai saltade la prime elementâr"

da "Prime di sere" di Carlo Sgorlon

indenant adi.inv., av.
(in-de-nant)

Che al è a un nivel alt tal disvilup sociâl, economic, tecnologjic e v.i.

sinonimi

progredît, disvilupât, indevant, avanzât

esempi

"contescj – dai Paîs catalans ae Galizie, de Irlande al Paîs Basc – là che e je une normative di tutele che, almancul su la cjarte, e je une vore indenant"

da "A Bruxelles, a Bilbao e a Udin: «O volìn une Europe pardabon unide te diversitât»" di Marc Stolf

indenant adi.inv., av.
(in-de-nant)

Orientât aes novitâts, ae inovazion, al progrès, ae modernitât (fig.)

sinonimi

gnûf, moderni, progressist, progredît, indevant, avanzât

esempi

"a sostignivin un program une vore indenant par chei timps: un salari compagn a chel dai oms, la assistence tai mês subit prin e dopo dal part, la pussibilitât di podê vê puescj di vore in cualsisei implei e no dome ta chês voris mancul cualificadis"

da "Une furlane cuintri la vuere e pai dirits des feminis " di Gotart Mitri

indenant adi.inv.
(in-de-nant)

Che al à une inteligjence svelte

sinonimi

inteligjent, svelt, sveât, indevant

esempi

"int tant indenant di jessi za rivade a capî e a judicâ lis vicendis e i fats, no dal cemût che a vegnin presentâts, ma dal significât che a àn in sostance e dal parcè che a sucedin"

da "La civiltât dal fum" di Riedo Pup

indenant s.m.
(in-de-nant)

[TS] (sport) Intal rugby, fal che al sta intal tirâ par indenant la bale cu lis mans

monolingue