SuperDizionari

jenfri av., prep.
(jen-fri)

Par introdusi un complement di lûc, ancje figurât, timp, cuantitât, par indicâ che alc o cdn., al è tal mieç di doi o plui elements, o tal mieç di un alc plui grant, ancje cun sens une vore gjeneric o figurât

sinonims

framieç, injenfri, par jenfri, tramieç, tra, fra

esemplis

"cul cjâf strent jenfri lis mans, al stave pensants"

gjavât fûr di "La Madalene" di Zuan Lurinçon

"si gjave il cjapielat passantsi i dêts jenfri dai cjavei bagnâts di sudôr"

gjavât fûr di "Madalene" di Franco Marchetta

Viôt ancje: jentri, enfri, entri, gnenfre, jenfre

jenfri av., prep.
(jen-fri)

Ancje in espressions fig., cun sfumadure di significât di compagnie e union

sinonims

framieç, injenfri, par jenfri, tramieç, tra, fra

esemplis

"ognidun che al jentre al sparìs jenfri amîs e parincj, ducj a domandâ di chel e di chê altre"

gjavât fûr di "La salamandrie tal fûc" di Carlo Tolazzi

jenfri av., prep.
(jen-fri)

Par pandi confront, alternative, diference, o ancje mancjance di diference, di plui personis o entitâts

sinonims

fra, tra

esemplis

"jo, o dîs il vêr, o tornarès a fâ il referendum o plebissît chel di za fa 150 agns, che nus vevin clamâts a sielzi jenfri Austrie e Italie"

gjavât fûr di "EuroAquileienses" di Albert Travain

jenfri av., prep.
(jen-fri)

Denant di tiermins no antitetics, al pant une sume parziâl o cumbinazion di elements

sinonims

tra, fra

esemplis

"jenfri che al jere tart, che al jere frêt e che ancje al ploveve, no vevi propit nissune voie di lâ fûr"

jenfri av., prep.
(jen-fri)

Par segnâ un limit massim di timp o di spazi o di cuantitât

sinonims

dentri

esemplis

"intant, jenfri un an e une dì Silveri al tire i sghirets, come che ur tocje a di chei che a zurin il fals "

gjavât fûr di "La mont cu la spice discrodeade" di Josef Cjargnel

"lenti ator di Baracêt - jenfri un rai di vot chilometros (par la cuâl a une distance minime) - a forin cjatadis testemoneancis langobardis"

gjavât fûr di "Une lance langobarde cjatade a Baracêt" di Lucio Perès

"a àn ricevût la intimazion di paiâ jentri setemane chi un contribût"

gjavât fûr di "Par paiâ al vûl mistîr" di Riedo Pup

jenfri s.m.
(jen-fri)

Spazi tra doi ogjets o dôs personis

sinonims

interval, trate

esemplis

"finî cu lis gjambis fra i jenfris dai lens"

gjavât fûr di "I ribei" di Alan Brusini

"al cjale il mûr gnûf: claps grancj, claps piçui, modon, e tai jenfris, scaiis cu la malte"

gjavât fûr di "La aghe da pît la cleve" di Dino Virgili

jenfri s.m.
(jen-fri)

Dade di timp tal mieç di un principi e di une fin, o che si diferenzie di un prime e un dopo compagns tra di lôr

esemplis

"ogni tant si fermave tal mieç dal discors, e in chei jenfris, cundut che il fogolâr al fos plen di int, si podevin sintî a crugnâ i carûi disore, tes cjamaris"

gjavât fûr di "Il sunsûr" di Meni Ucel

monolengâl