SuperDizionari

jenfri av., prep.
(jen-fri)

Par introdusi un complement di lûc, ancje figurât, timp, cuantitât, par indicâ che alc o cdn., al è tal mieç di doi o plui elements, o tal mieç di un alc plui grant, ancje cun sens une vore gjeneric o figurât

sinonimi

framieç, injenfri, par jenfri, tramieç, tra, fra

esempi

"cul cjâf strent jenfri lis mans, al stave pensants"

da "La Madalene" di Zuan Lurinçon

"si gjave il cjapielat passantsi i dêts jenfri dai cjavei bagnâts di sudôr"

da "Madalene" di Franco Marchetta

Vedi anche: jentri, enfri, entri, gnenfre, jenfre

jenfri av., prep.
(jen-fri)

Ancje in espressions fig., cun sfumadure di significât di compagnie e union

sinonimi

framieç, injenfri, par jenfri, tramieç, tra, fra

esempi

"ognidun che al jentre al sparìs jenfri amîs e parincj, ducj a domandâ di chel e di chê altre"

da "La salamandrie tal fûc" di Carlo Tolazzi

jenfri av., prep.
(jen-fri)

Par pandi confront, alternative, diference, o ancje mancjance di diference, di plui personis o entitâts

sinonimi

fra, tra

esempi

"jo, o dîs il vêr, o tornarès a fâ il referendum o plebissît chel di za fa 150 agns, che nus vevin clamâts a sielzi jenfri Austrie e Italie"

da "EuroAquileienses" di Albert Travain

jenfri av., prep.
(jen-fri)

Denant di tiermins no antitetics, al pant une sume parziâl o cumbinazion di elements

sinonimi

tra, fra

esempi

"jenfri che al jere tart, che al jere frêt e che ancje al ploveve, no vevi propit nissune voie di lâ fûr"

jenfri av., prep.
(jen-fri)

Par segnâ un limit massim di timp o di spazi o di cuantitât

sinonimi

dentri

esempi

"intant, jenfri un an e une dì Silveri al tire i sghirets, come che ur tocje a di chei che a zurin il fals "

da "La mont cu la spice discrodeade" di Josef Cjargnel

"lenti ator di Baracêt - jenfri un rai di vot chilometros (par la cuâl a une distance minime) - a forin cjatadis testemoneancis langobardis"

da "Une lance langobarde cjatade a Baracêt" di Lucio Perès

"a àn ricevût la intimazion di paiâ jentri setemane chi un contribût"

da "Par paiâ al vûl mistîr" di Riedo Pup

jenfri s.m.
(jen-fri)

Spazi tra doi ogjets o dôs personis

sinonimi

interval, trate

esempi

"finî cu lis gjambis fra i jenfris dai lens"

da "I ribei" di Alan Brusini

"al cjale il mûr gnûf: claps grancj, claps piçui, modon, e tai jenfris, scaiis cu la malte"

da "La aghe da pît la cleve" di Dino Virgili

jenfri s.m.
(jen-fri)

Dade di timp tal mieç di un principi e di une fin, o che si diferenzie di un prime e un dopo compagns tra di lôr

esempi

"ogni tant si fermave tal mieç dal discors, e in chei jenfris, cundut che il fogolâr al fos plen di int, si podevin sintî a crugnâ i carûi disore, tes cjamaris"

da "Il sunsûr" di Meni Ucel

monolingue