SuperDizionari

lâ indaûr loc.v.

Movisi de bande contrarie a ce che al è devant o ae direzion che si veve prime (ancje fig.)

esemplis

"dal '66 [i furlans] a spietarin cun pazience e cun rassegnazion che todescs e talians a finissin di lâ indaûr e indenant"

gjavât fûr di "Cuintristorie dal Friûl dal 1866 fint in dì di vuê" di Josef Marchet

"e sintive lis peraulis, e viodeve lis senis, lis tornave a vivi, come cuant che si ferme il proietôr e si va indaûr cu la pelicule"

gjavât fûr di "Fûr di timp" di Jolanda Mazzon

lâ indaûr loc.v.

Vê une involuzion, un decjadiment

esemplis

"la pierdite (o, dut câs, il lâ indaûr de furlanetât) e je un dam par ducj, no dome pai furlans"

gjavât fûr di "Tal cûr dal Friûl orientâl" di Laurin Zuan Nardin

" il PSOE al reste il prin partît dal Stât spagnûl in tiermins relatîfs ma al va indaûr par numar di vôts"

gjavât fûr di "Il Tsunami democratic catalan e la confusion in Spagne" di Marc Stolf

lâ indaûr loc.v.

Resonâ, ricuardâ, investigâ, ipotizâ, fevelâ e v.i. di alc che al è sucedût prime intal timp

esemplis

"i miei vons, par tant che o vadi indaûr, a jerin contadins"

gjavât fûr di "Trê feminis" di Gianni Gregoricchio

"ricostruint la storie passade dal univiers, lant indaûr tal timp o vin un univiers simpri plui piçul fin a ridusisi a un pont"

gjavât fûr di "Teologjie algjebriche" di Sergio Cecotti

"une volte, e no covente lâ indaûr di tancj agns, i nestris nonos a tignivin di cont dut"

gjavât fûr di "Il cjaliâr di Tumieç. Un mistîr vecjo par un fantat zovin" di Marta Vezzi

lâ indaûr loc.v.

Jessi sucedût tal passât

esemplis

"la date di nassite dal teatri moderni in Slovenie e va indaûr ae fin dal secul XVIII, di precîs ai 28 di Dicembar dal 1789, cuant che pe prime volte e fo rapresentade a Lubiane la opare di Anton Tomaž Linhart Županova Micka"

gjavât fûr di "Il magjic mont dal teatri" di Alessio Potocco

monolengâl