SuperDizionari

larc adi.

Che al è avonde o une vore grant te dimension largjece, vâl a dî te dimension che no je ni lungjece ni altece

sinonimi

ampli

esempi

"i flums imburîts e salvadis cul gravâr largjonon a ûs il Tiliment, o come chei strents e plens di aghe cuiete come la Livence"

da "Il Friûl al è nassût cussì" di Josef Cjargnel

"la strade e scomençave a lâ in rive jù e si tignive simpri plui dongje dal flum e e jere avonde largje"

da "In Friûl, nossere" di Agnul di Spere

"un cjapelat cu lis alis largjissimis"

da "Il diau sul Studeniz" di Giovanni Luigi Filli

"Sant Zuan. Na glisiona largja largja, un paisut strent strent"

da "Peneladis" di Pier Paolo Pasolini

larc adi.

Che al è grant in gjenerâl, in dutis lis dimensions, che al à tant puest

sinonimi

ampli, grant, vast, viert

esempi

"il tinel, larc e plen di mobilie, al someave pront a scjafoiâti di baroc, tapêts e coltrinis"

da "La salamandrie tal fûc" di Carlo Tolazzi

larc adi.

Che al à puest a disposizion, che al sta comut

sinonimi

comut, asiât

esempi

""Ti fasìno plui puest?" "Nol covente, o soi za larc ca""

larc adi.

Tignût viert, lontan di alc altri, spec. di elements che a van insiemi e che a podaressin stâ dongje tra di lôr o dongje di alc altri

sinonimi

slargjât, viert

esempi

"al lave mostrant la sô marcjanzie cui braçs larcs"

da "I colaçs" di Meni Ucel

larc adi.

Pront a dâ, gjenerôs (fig.)

sinonimi

gjenerôs, ladin, liberâl, magnanim

esempi

"“I contadins no son mai di “datimis”” e diseve jê ridint “no son mai larcs…”"

da "Cjase di Dalban" di Maria Forte

"a era ladina di cour e largja tal dâ via"

da "Se i tu mi voul, tu mi voul" di Novella Cantarutti

larc adi.

Di alc di imateriâl, che al cjape dentri, che al tocje tancj elements, argoments e v.i. (fig.)

sinonimi

bondant, grant, grues, penç, ampli, slargjât

esempi

"dâ al Friûl une forme di autonomie plui largje che no aes altris regjons talianis"

da "Cuarde e savon" di Josef Marchet

"i unics riferiments ae lenghe furlane in tescj normatîfs [...] a vevin caratar incidentâl o ben a jerin di tutele de lenghe tune suaze plui largje di promozion culturâl"

da "Relazion dal Grup di lavôr “Planificazion linguistiche”" di Donato Toffoli

"si sintive distacât dal presint e al viodeve lis robis intune prospetive plui alte e plui largje"

da "Prime di sere" di Carlo Sgorlon

larc adi.

Che no si ferme al significât leterâl (fig.)

sinonimi

ampli

esempi

"Crist nus à insegnât a domandâ ogni dì il pan che nus covente, te plui largje acezion"

da "Sant Jacum, là che al finìs il mont" di Antoni Beline

larc s.m.

Estension frontâl, dimension che no je ni la altece, ni la lungjece

sinonimi

largjece

esempi

"su la cjarte gjeografiche la isule e someave une sclese di ongule [...] che e faseve 30 Km di larc par 15 di lunc"

da "Eivissa mon amour" di Fabian Ros

larc s.m.

Spazi viert e libar, spec. rispiet a alc che al siere ator o a alc che pal rest al è stret

sinonimi

slarc

esempi

"al veve scuviert che là che i sterps a lassavin un spêl di larc, il teren al jere dut sflorît di piçulis rosis blancjis"

da "La liende dal riûl" di Franca Mainardis

"si cjatà te sale di spiete: un larc jenfri dôs riis di cjamaris tal mieç dal repart là che e tacave la chirurgjie dai umigns"

da "Tal ospedâl" di Amedeo Giacomini

larc s.m.

[TS] (agr.) Striche di tiere jenfri doi filârs

sinonimi

mitât, plagne, plane, peçâl, fîl

esempi

"un larc dal cjamp"

da "Il Nuovo Pirona" di Giulio Andrea Pirona, Ercole Carletti, Giovanni Battista Corgnali

larc s.m.

Mâr viert, mâr lontan de rive

esempi

"vevin scoviart un on che vogava al larc intuna barcja"

da "Gnot di Sant Silvestri" di Ranieri Mario Cossâr

monolingue