SuperDizionari

lidrîs s.f.
(li-drîs)

Part di une plante che si infonde sot tiere

esemplis

"i lens che a jerin ingrampâts tai crets cu lis lôr lidrîs stuartis, tant che sgrifis di strie"

gjavât fûr di "Cretevierte" di Roberto Ongaro

"al cjaminà al cjaminà [...] atent dome a no inçopedâsi tes lidrîs o sbrissâ sul muscli "

gjavât fûr di "La tiere di Lansing" di Maria Forte

"al jere l'ort botanic plen di jerbis e lidrîs che la int a sielzevin cuintri ducj i mâi"

gjavât fûr di "Come tai romançs" di Alan Brusini

Viôt ancje: radîs, radrîs, ladrîs, ladrie, lidrie

lidrîs s.f.
(li-drîs)

Part profonde di alc (ancje fig.)

esemplis

"par me, al deventava alc di pi: al era un fâmi cu li robi, un supâ ta li radîs fondi da la cjera la fievra dal spetâ, il cjant dal sbrocâsi e dal distrudasi"

gjavât fûr di "Pesteli" di Novella Cantarutti

lidrîs s.f.
(li-drîs)

Base, part basse di alc (fig.)

sinonims

cûr, çucul, fonde, pît

esemplis

"il cjistiel [di Çuc] lu faserin sù i siôrs di Cucagne; al jere part di un sisteme difensîf che al tacave de lidrîs de mont"

gjavât fûr di "www.consorziocastelli.it" di Consorzi pe difese dai cjistiei storics dal Friûl - Vignesie Julie

lidrîs s.f.
(li-drîs)

Origjin, cause (fig.)

sinonims

cause, cûr, fonde, gnerf, medole, poç, principi, reson, vues

esemplis

"sui nobii che no rivin a scjampâ si sbroche fûr une asse che e à lidrîs lontanis"

gjavât fûr di "Il Friûl de Joibe Grasse dal 1511" di Carli Pup

"i grêcs par prins a ricognossevin in Omêr la lidrîs no dome de lôr epiche, ma di dute la lôr civiltât"

gjavât fûr di "Jentrade de Odissee" di Sandri Carrozzo, Pierluigi Visintin

lidrîs s.f.
(li-drîs)

[TS] (ling.) Part di peraule tes lenghis flessionâls e aglutinantis che e reste fisse daspò di vê gjavadis dutis lis parts flessivis e derivazionâls, e che e à valôr semantic e e reste in ducj i vocabui de stesse famee lessicâl

sinonims

element radicâl, radicâl

esemplis

"sul prin, o jerin par mantignî la forme de lidrîs des peraulis dilunc de flession: stess come stesse, cjantad come cjantade"

gjavât fûr di "La grafie furlane normalizade – Introduzion" di Xavier Lamuela

lidrîs s.f.
(li-drîs)

[TS] (ling.) Base etimologjiche recuperade li che si ripuartin lis formis lessicâls distintis di diviersis lenghis storichis

esemplis

"il non di Vençon al ven [...] di Auentione, cuntune lidrîs prelatine che e vûl dî “sorzint”, “riu”."

gjavât fûr di "La culine furlane" di Luigina Di Giusto, Andrea Guaran e Mauro Pascolini

lidrîs s.f.
(li-drîs)

[TS] (filos.) Tes filosofiis antighis, principi materiâl di ogni robe

sinonims

archè

lidrîs s.f.
(li-drîs)

[TS] (mat.) Numar che, elevât ae potence che e corispuint al indiç de estrazion, al da il numar sometût ae estrazion stesse

esemplis

"la lidrîs cuadre di 16 e je 4"

monolengâl