SuperDizionari

lusorôs adi.
(lu-so-rôs)

Che al ilumine, che al fâs lûs

sinonimi

slusint, luminôs, sflandorôs

esempi

"[il planetari] nus insegne a orientâsi tal cîl e a cjatâ lis costelazions e lis stelis plui lusorosis, nus fâs viodi il soreli e i planets"

da "Strolic furlan 2013" di Gloria Angeli

lusorôs adi.
(lu-so-rôs)

Di espression, cjalade e v.i., plene di serenitât, ligrie, felicitât, entusiasim e v.i. (fig.)

sinonimi

luminôs, slusint, sflandorôs

esempi

"Nita e jere une fantacine cui voi bogns e lusorôs che, tal ridi, e faseve vignî tal cjâf cualchi conte di agnui"

da "La aghe da pît la cleve" di Dino Virgili

"la muse dal Pelegrin si fasè ridinte e lusorose, come se al ves grandis robis di dî sun chel argoment"

da "Il dolfin" di Carlo Sgorlon

lusorôs adi.
(lu-so-rôs)

Che si pues paragonâ cu la lûs, par une cualsisei cualitât positive (fig.)

sinonimi

sflandorôs, luminôs

esempi

"de Svuizare nol covente fevelâ: al è il plui lusorôs, il plui fortunât, il plui persuasîf esempli di ordenament federâl dal mont"

da "Trê salts tal scûr: costituzion - republiche - autonomie" di Josef Marchet

lusorôs adi.
(lu-so-rôs)

Fat cun pompe, cun spese, cun ricjece (fig.)

sinonimi

pompôs, siôr, lussuôs, ric, sontuôs, sflandorôs

esempi

"eco i cjantôrs e lis confraternitis e il plevan cul piviâl tiessût di fîi di aur, contornât dai zaguts, che al puarte il Santissim sot il baldachin lusorôs"

da "Corpus Domini" di Pieri Somede dai Marcs

monolingue