SuperDizionari

mace s.f.
(ma-ce)

Toc di len lunc, cun cualsisei funzion, par poiâsi cuant che si cjamine, par sostignî alc, par fâ di mani lunc a cualchi imprest, par fâ di arme e v.i.

sinonims

baston, aste, racli

esemplis

"[il maçarot] al è un spirt che al fâs dispiets: pal plui al bat cu la sô mace cuintri dai arbui o dai claps, par spaurî i boscadôrs o cui che al va pal bosc"

gjavât fûr di "Friûl di Magance" di Sandri Carrozzo

"e jentre çueteant, poiantsi su la mace"

gjavât fûr di "La buteghe dal barbîr" di Pieri Somede dai Marcs

"il lupiament de mace de bandiere, tun rivoc alt di lûs, al passe il cjamp lampant parsore de sacume nere di chê altre schirie"

gjavât fûr di "Madalene" di Franco Marchetta

mace s.f.
(ma-ce)

[TS] (artes.) Cilindri di len par tirâ la paste

sinonims

mescul

esemplis

"cu la mace, tirâ la paste a linzûl e taiâle a blecs"

gjavât fûr di "Blecs di cjanâl" di Lucian Verone

mace s.f.
(ma-ce)

Imprest, massime di len o di metal, par pestâ ingredients di cusine o di speziarie

esemplis

"peste cu la mace intun mortâl di len e filtre. Il sirop otignût al è une “aspirine naturâl”"

gjavât fûr di "Sirop (magjic) di violutis" di Natascia Gargano

mace s.f.
(ma-ce)

[TS] (artes.) Martiel grant che si lu cjape cun dôs mans o che al è montât suntune part mecaniche mote da la aghe o di un altri sisteme

sinonims

maçuele, maçûl

esemplis

"cualchi zornade al lave li di mestri Pieri [il fari] a dâ une man a boli, che tocjave jessi in doi a bati la mace"

gjavât fûr di "Il muc" di Roberto Ongaro

mace s.f.
(ma-ce)

[TS] (becj.) Arme fate di un baston lunc cuntun cjâf pesant di metal, par copâ lis bestiis cuntun colp fuart tal cjâf

esemplis

"e jerin lâts te stale a viodi se lis vacjis a jerin dutis muartis che, se e fos restade vive une sole, le varessin copade cu la mace ancje chê"

gjavât fûr di "Amîs come prime" di Alan Brusini

mace s.f.
(ma-ce)

[TS] (mus.) Len, che di une bande al pues ancje vê une bale di feltri, doprât par sunâ struments a percussion

sinonims

bachete

esemplis

"[...] al salte fûr / cu la mace dal tambûr, / il tambûr al tamburave / e la odule e sivilave"

gjavât fûr di "Sacheburache" di Zuan Nazzi Matalon, Ottorino Burelli

mace s.f.
(ma-ce)

[TS] (sport) Imprest lunc e plui o mancul fin, doprât in plui dissiplinis par bati la bale o sim.

esemplis

"al vierç la capote dal automobil. Al tire fûr il sac des macis [di golf], sal cjarie su lis spalis"

gjavât fûr di "Il President" di Sergio Ceccotti

mace s.f.
(ma-ce)

[TS] (artes.) Sorte di jeve o baston dal telâr che e covente par fâ zirâ il subli o il sublet

mace s.f.
(ma-ce)

[TS] (micol.) Fonc avonde grant, che si pues mangjâ, cul pît lunc e stielôs e il cjapiel sierât in forme di bale di zovin, viert a ombrene cuant che al è madûr, lat.sient. Macrolepiota procera

sinonims

mace di tambûr, ombrene

mace s.f.pl.
(ma-ce)

[TS] (astron.) La costelazion di Orion e il timp che si le viôt di gnot (pop.)

esemplis

"jo o ai tacât a contâ lis stelis cu la mê bionde, po dopo a mostrâi, di aspert tant che o jeri, il Cjar Mat, lis Macis, la Stele Polâr..."

gjavât fûr di "Gnot di Avost" di Meni Ucel

"lis tiradressis di file, te stale, dutis lis Macis di Zenâr, a impararan, cu lis mans des vielis, a fâ la scovolade, a trasi, a stuarzi sul filadôr"

gjavât fûr di "La aghe da pît la cleve" di Dino Virgili

monolengâl