SuperDizionari

meti sù loc.v.

Meti alc parsore di alc altri

esemplis

"tornâ a meti sù un clap sore chel altri"

gjavât fûr di "La vite di chest mont, cence un pôc di spirt, e devente brute e insopuartabile" di Francesc Placerean

meti sù loc.v.

Fâ jentrâ tun orifizi dal cuarp

esemplis

"[il dotôr] al tacà subit a visitâlu: palpe a diestre, palpe a çampe; sint i polmons, viôt i voi, met sù il dêt di chê bande daûr, par viodi se la prostate e jere a puest"

gjavât fûr di "Jacum dal miedi" di Angelo Covazzi

meti sù loc.v.

Montâ alc che si tache, che si picje, che al sta a contat, che al sta impins e v.i.

esemplis

"ma tant e tant soi bon / di spegaçâ portons, / di tasselâ bragons, / di nasâ un caratel, / di meti sù un spinel"

gjavât fûr di "La mê biografie" di Pieri Çorut

"si tratave di meti sù lis cjampanis gnovis"

gjavât fûr di "Predis di ogni fate" di Riedo Pup

meti sù loc.v.

Stampâ o publicâ

esemplis

"il diretôr Alberto Buvoli mi veve impromitût di publicâ su la riviste "Storia contemporanea in Friuli" une recension che i vevi antecipade. Je ai dade tal mês di Avrîl, ma no me à metude sù"

gjavât fûr di "La storie vere de "Garibaldi-Natisone"" di Luche Nazzi

meti sù loc.v.

Meti alc, soredut vistîts, scarpis, furniments e v.i., a contat cul cuarp

sinonims

meti intor, meti aduès, meti

esemplis

""E intant doman, che e ven la contesse, no varai un fîl di vistît di meti sù par presentâmi, e par no parè propit une contadinate!""

gjavât fûr di "Mariute" di Ercole Carletti

"tornant a meti sù i ocjai forsit cumò il plevan si inacuarç di alc che prime nol podeve viodi"

gjavât fûr di "Madalene" di Franco Marchetta

meti sù loc.v.

Soredut in riferiment ai dincj, jessi tal moment che a tachin a vignî fûr

esemplis

""[...] tu mi rontis come une frutute, co mi met sù i dincj di lat! Meni!... e tu mi vaiussis in chist mût, tu mi frichis!""

gjavât fûr di "Mi ûstu ben" di Dolfo Zorzut

meti sù loc.v.

Riferît ai chilos, ae panze, al gras e v.i., deventâ plui pesant

sinonims

butâ sù

esemplis

"miôr doprâ pôc o nuie i gras saturs di origjin animâl tant che spongje, ardiel, saìn e pane, parcè che il consum ecessîf di chescj gras al fâs meti sù chilos in plui"

gjavât fûr di "Mangje san 3" di Guglielmo Pitzalis

meti sù loc.v.

Riferît ai agns, deventâ plui vecjo o vê aspiet di plui vecjo

esemplis

"«Al par che al vei metût sù cent agn, siôr Simon, e di pôc incà»"

gjavât fûr di "La tiere di Lansing" di Maria Forte

meti sù loc.v.

Cjapâ une ande, vê une maniere di fâ

esemplis

""Se vuê, in cheste cjase e vês un dovê, al è di no meti sù i aiars di une volte""

gjavât fûr di "Il çoc" di Ercole Carletti

"«Biât frut» al pensà Zuan «al à za metût sù une grinte di "socsfîr" che al console»"

gjavât fûr di "La tiere di Lansing" di Maria Forte

meti sù loc.v.

Fâ, preparâ e furnî alc par che al puedi fâ une ciert funzion, soredut in riferiment a ativitâts economichis

sinonims

prontâ, fâ, vierzi

esemplis

"in timp di militâr, al veve fate amicizie cuntun ustîr di Praclûs, che al veve metude sù une ostarione cun tant di zûc di balis"

gjavât fûr di "Îr e doman" di Gianni Gregoricchio

"il progjet di meti sù une fabriche di tiessidure al jere stât spampanât in lunc e in larc e tante biade int, bisugnose di lavorâ, massime zoventût, e veve domandât di podê lâ a vore te gnove industrie"

gjavât fûr di "Chei di Muraie" di Pieri Menis

meti sù loc.v.

Fâ une ativitât o une struture che e domande preparazion, organizazion

sinonims

imbastî, inmaneâ, dâ dongje, fâ, meti adun, meti dongje, vierzi, tacâ

esemplis

"la regjon, come che e sarà imbastide in Italie no disberdee nuie, no comede nuie, no zove nuie. E, in fin dai conts, no nus impuarte nuie che le metin sù o che no le metin sù"

gjavât fûr di "Lôr no molin e nô no molìn" di Josef Marchet

"si à començât a sintî a dî che ca e là a metevin sù une “vuardie nazionâl pe sigurece dal popul”"

gjavât fûr di "Il prin moto" di Riedo Pup

"o vevin metût sù a fuarce di vitis une biele comedie"

gjavât fûr di "In teatro" di Pieri Somede dai Marcs

meti sù loc.v.

Imponi o contâ une spese, un contribût

sinonims

fissâ, imponi, cjamâ, cjariâ

esemplis

"cuissà ce tasse di famee che mi meteve sù… cun chê famee che o ai jo, sôl come un cjan!"

gjavât fûr di "Une scarpute" di Pieri Somede dai Marcs

meti sù loc.v.

Meti alc tal fogolâr o te stue o sul fûc par che al brusi

esemplis

""Sù, sù dati coragjo Rose, il Signôr ti judarà, bute vie un pôcs di pinsîrs, al è Nadâl, vin di sei ducj in pâs…" "A podêlu… pai, no ise ore di meti sù la çocje?""

gjavât fûr di "Vilie di Nadâl" di Pieri Somede dai Marcs

"flame no 'nd jere plui, ma dome un côl di boris rossis. Al metè sù doi tocs di len e al vierzè il respîr par che a cjapassin miôr"

gjavât fûr di "Prime di sere" di Carlo Sgorlon

meti sù loc.v.

Meti a cuei

esemplis

""Servît un fiasc di chel bon in tinel e dopo meteit sù il cafè""

gjavât fûr di "Co l'amôr al cimie" di Costantino Smaniotto

"jê si scunfusionà dute par meti sù la mignestre, parcè che no veve plui une idee di fâ di mangjâ"

gjavât fûr di "Di là de rêt" di Jolanda Mazzon

meti sù loc.v.

Fâ lâ tun aparât, tun implant, soredut di riproduzion di musiche, video e v.i.

esemplis

"al tacà il gramofon e al metè sù il toc plui biel dai Spiders From Mars, "Starman""

gjavât fûr di "Sense" di Checo Tam

meti sù loc.v.

Fâ che cdn. al sedi in contrast cun cdn. altri

esemplis

""Che nol stedi a lassâsi simpri meti sù di chê femine cuintri di me!""

gjavât fûr di "Mariute" di Ercole Carletti

"la Luzie e cirive saldo di meti sù ducj e alçâ mûrs di cjacaris fra lôr e lis fameis. Peçots dome a nivel dai curtîi, va ben, ma cun dut achel a siôr Bertin i jere scomençât il batiment di cûr"

gjavât fûr di "Cjase di Dalban" di Maria Forte

meti sù loc.v.

Meti cdn. tun puest di podê

esemplis

"["chei de fasse"] no jerin ben viodûts di nissun: ni dai todescs, che no si contentavin mai di nuie, ni dai nestris che a scrupulavin che ju vessin metûts sù i mucs par spionâ in paîs"

gjavât fûr di "I piavots, Titon e la spagnole" di Alviero Negro

meti sù loc.v.

Fâ jentrâ in vore

sinonims

istituî

esemplis

"il rît aquileiês lu à butât jù lui [sant Paulin] e al à metût sù il messâl franc"

gjavât fûr di "La nestre storie" di Francesc Placerean

monolengâl