SuperDizionari

mostre s.f.
(mos-tre)

Azion, cundizion, situazion e v.i. che e fâs che alc si viodi ben

esemplis

"al veve cjapât ancje acuilis e poianis, che cumò a stevin imbalsamadis, cun bec e sgrifis ben in mostre , in dutis lis ostariis e lis buteghis de valade"

gjavât fûr di "Il dolfin" di Carlo Sgorlon

"la fantate e veve tirâts sù i cjavei a cocon, lassant in mostre un cuel lunc e blanc e dôs orelutis pitininis"

gjavât fûr di "Lilie" di Gianni Gregoricchio

mostre s.f.
(mos-tre)

Esemplâr di prodot o sim. che si da di viodi, di cjalâ o di provâ par valutâlu

sinonims

campion, esemplâr, prove, cerce

esemplis

"al va ator cu lis mostris di pano, di vueli, di cafè, di forment, ma nol cumbine un afâr"

gjavât fûr di "Il Nuovo Pirona" di Giulio Andrea Pirona, Ercole Carletti, Giovanni Battista Corgnali

mostre s.f.
(mos-tre)

Element o azion che al fâs jessi clare la esistence, la nature, lis carateristichis o lis capacitâts di alc o di cdn.

sinonims

cerce, prove, dimostrazion

esemplis

"[Camillo] al è a Rome tal 1509, cuant che ancjemò Erasmo al ricuarde lis sôs mostris di grande braùre oratorie"

gjavât fûr di "Il brevet" di Mario Turello

mostre s.f.
(mos-tre)

Cuantitât di robis o personis che a àn ciertis carateristichis

esemplis

"in ducj i agns vignûts dopo, ator dal curtîl si è ingrumade une mostre curiose di cjasis, cjasutis, e casopis che si tegnin sù une cu la altre"

gjavât fûr di "La rive di Sant Pieri" di Maria Forte

mostre s.f.
(mos-tre)

Part di une buteghe che e da su la strade, pal solit vierte o cun veris in maniere che la int e puedi viodi i prodots

sinonims

vetrine

esemplis

"si spassize in Merceria e si cjale lis mostris dai negozis. Cetantis maraveis!"

gjavât fûr di "Viaç a Vignesie" di Arturo Feruglio

mostre s.f.
(mos-tre)

Part dal orloi li che a son segnadis lis oris

esemplis

"da chê cjamare si podeve lâ sù te specule, sù pe torate, là che al è ancjemò l'orloi, cui pês sul pat de scjale e la mostre par difûr"

gjavât fûr di "La teme - Une gnot intun cjastiel" di Giovanni Gortani

mostre s.f.
(mos-tre)

Iniziative li che si fasin viodi oparis di art, reperts, fotografiis, ogjets di interès o ancje prodots comerciâi di une cierte sorte

sinonims

esposizion

esemplis

"cun cheste curiositât o sin lâts a dâ un cuc, ancje, ae mostre dai pitôrs carintians"

gjavât fûr di "Pitôrs di là de stangje" di Josef Marchet

""[...] sâstu mame ce che al è sucedût l'an passât di là a la mostre di Palmegnove? in file dilunc i moronârs sul marcjât a jerin peâts i nemâi in esposizion [...]"

gjavât fûr di "Il prossim" di Pieri Somede dai Marcs

mostre s.f.
(mos-tre)

[TS] (milit.) Element di forme e colôr specific, che si tache pal solit tal dacuel o tes spalis des monturis, che al fâs individuâ la apartignince a une cierte arme, a un ciert cuarp o a un ciert repart

sinonims

mostrine

esemplis

"a Vignesie e son di stanze i granatîrs dal reziment di Trevîs des mostris zalis, e chei da Udin des mostris verdis, in dut cuatri compagniis"

gjavât fûr di "A la sagre di Mion" di Giovanni Gortani

monolengâl