SuperDizionari

monolengâl

mut adi., s.m.

Che, cui che par cualchi disturp o lesion nol rive a fevelâ

esemplis

"cualchidun [pe vuere in trincee] al pierdeve lis capacitâts sensoriâls: vuarbetât, sorditât o che al deventave mut"

gjavât fûr di "Stupit di vuere" di Angelo Floramo

"[un infermîr] al cjapà sot braç Antoni, judantlu a puartâ chel so vecjo cuarp mut dentri di chel palaç forest che di masse agns al jere deventât la sô cjase"

gjavât fûr di "Lis cialis" di Christian Romanin

mut adi., s.m.

Che, cui che nol fevele intun ciert moment, ancje se al pues fevelâ (fig.)

sinonims

cidin

esemplis

"po al jentrà ancje Guri: mut. Al slungjà lis mans paonacis sul fûc dal spolert, sfreolantses un pôc"

gjavât fûr di "La aghe da pît la cleve" di Dino Virgili

"jê, la vecje, e restave frede e mute come une statue"

gjavât fûr di "Chei di Muraie" di Pieri Menis

mut adi.

Che nol fâs sunsûr o li che no si sintin sunsûrs (fig.)

esemplis

"chê incaronadura di crets su la aga simpri muta"

gjavât fûr di "La aghe da pît la cleve" di Novella Cantarutti

"[la cjase] e restave li, sierade e mute, a conservâ il segret di chê muart"

gjavât fûr di "Cretevierte" di Roberto Ongaro

"mûrs e fogolârs no fevelin. A son une presince mute, ma penze"

gjavât fûr di "Trê feminis" di Gianni Gregoricchio

mut adi.

Che nol è pandût a peraulis o che nol è pandût par nuie (fig.)

sinonims

cidin, platât, scosagn, scuindût, nascuindût, cuviert

esemplis

"lui al reste cidin [...], involuçât te cape des domandis mutis dai presints"

gjavât fûr di "Madalene" di Franco Marchetta

"par cjatâ un fregul di salustri a chel dolôr, mut, che lu lambicave, Mario, al tornave jenfri i ricuarts dai Nadâi passâts, cuant che al jere frut"

gjavât fûr di "Chel Nadâl spietât" di Nello Malisano

mut adi., s.m.

[TS] (cinem.) Dal cine dai prins timps, o par sielte ancje dai timps seguitîfs, che nol veve il sun o che nol veve il sun dal fevelât

esemplis

"“Cinemazero” di Pordenon e “La Cineteche dal Friûl” di Glemone a organizin il classic apontament internazionâl dedicât al cine mut"

gjavât fûr di "Un an di cine" di Redazion La Patrie dal Friûl

mut adi.

[TS] (gram.) Di segn grafic, che ancje se al ven scrit nol ven pronunziât

esemplis

"al baste vê une regule che e disi che chest v si lu scrîf simpri ma che in ciertis varietâts al è mut"

gjavât fûr di "La grafie furlane normalizade – Introduzion" di Xavier Lamuela

detulis

"doi muts no puedin intindisi"

"i muts a fevelin a mots"

"i muts no si po capîju"

"se tu vûs sei ben viodût, tenti sort e ancje mut"

torne sù