SuperDizionari

monolengâl

nasâ v.tr.
(na-sâ)

Sintî l'odôr, sedi par azion volontarie che par percezion spontanie tirant sù aiar cul nâs

sinonims

nulî, usmâ

esemplis

"al da un colp al grop dal cuel de butilie che al salte vie come une cocule... Al nase... Ah, ce profum! ... Al cerce... rosoli, tant che rosoli!"

gjavât fûr di "Doi pizighets e un lari" di Pieri Menis

"ti viôt el sclopon ta tace, lu tire jù, lu nase"

gjavât fûr di "La furlane" di Dolfo Zorzut

nasâ v.tr.
(na-sâ)

Tirâ sù cul nâs, ancje no dome par sintî l'odôr

sinonims

tirâ sù

esemplis

"il Mestri pacjific, / nasant la presute, / se gjave di un socio / che al vesse, che al rute"

gjavât fûr di "Ai Piombi" di Romeo Battistig (?)

nasâ v.tr.
(na-sâ)

Presintî alc, capî alc in maniere intuitive (fig.)

sinonims

lampâ, olmâ, capî, induvinâ, intuî, nulî, usmâ

esemplis

""Aial viodût ce dal diambar che al nasseve?" "O savevi… o savevi… mi pareve fin di savêlu… lu vevi nasât ancje jo!" "Un fregul ancje jo lu vevi nasât!""

gjavât fûr di "Un grop sul stomi" di Arturo Feruglio

"e stave in vuaite, nancje che e nasàs cuissà ce pericul"

gjavât fûr di "Îr e doman" di Gianni Gregoricchio

nasâ v.tr.
(na-sâ)

Valutâ, viodi se alc o cdn. al è interessant o no (fig.)

esemplis

"vincj di lôr a jerin a stâ sù tal fogolâr di puar Gjildo: fantats (che a vignivin a nasâ chês dôs fiis di Gjildo), fantatis dal borc, viei, babis [...]"

gjavât fûr di "Il sunsûr" di Meni Ucel

nasâ v.intr.
(na-sâ)

Fâ odôr, vê un odôr

sinonims

nulî, odorâ

esemplis

"«Buine sere» dissal Eliseo. «Buine» al rispuindè l'ostîr, biel cjalantlu fis. [...] L'ambient al nasave di tabac, di salam e di vin"

gjavât fûr di "Prime di sere" di Carlo Sgorlon

""Di ce nasial il gno cjâf?" i domande la viele. "Di bon odôr" i rispuint la frutate"

gjavât fûr di "La fie e la fiastre" di Andreina Nicoloso Ciceri

"a jerin floridis lis paugnis, i saûts a nasavin a fuart cu lis rosis largjis a cjapielute"

gjavât fûr di "La aghe da pît la cleve" di Dino Virgili

nasâ v.intr.
(na-sâ)

Plasê, jessi volût (fig.)

sinonims

plasê, pocâ, smecâ, lâ

esemplis

"a chel zerbinot no i comodave di stâ a direzi la fatorie, no i nasave di stâ a tratâ cui contadins, a fevelâ di vacjis, di ledan..."

gjavât fûr di "La braide" di Pieri Somede dai Marcs

detulis

"cui che al à bon nâs lis nase a la lontane"

"cui che al à il nâs lunc lis nase a la lontane"

"cui che al puce al sminuce, cui che al nase al travase"

"cui che le nase le travase, cui che le nûl le trai pal cûl"

"cui che le tire le nase"

"di istât o tirâ o nasâ"

"i litighents a nasin il past e i avocats lu mangjin"

"miôr tirâ che no nasâ"

torne sù