SuperDizionari

note s.f.
(no-te)

Regjistrazion di un dât o scrit curt cuntune memorie par se stes o un messaç par altris

sinonimi

apont, notazion

esempi

"notis impuartantis come la ploie colade in ce mês e in ce an, trope nêf e se sute o bagnade"

da "I forescj" di Alan Brusini, Gian Paolo Linda

note s.f.
(no-te)

Coment a un test o su di un argoment, scrit o ancje coment a vôs

sinonimi

coment, glosse

esempi

"te Histoire de ma vie si cjate invezit il Refosc, e dutis lis notis a comentin che tal Sietcent il plui preseât al jere chel di Faedis"

da "Friûl e furlans te Histoire de ma vie di Giacomo Casanova" di Pierluigi Visintin

"simpri a rivuart dal ûs sociâl de lenghe, une ultime note: e mancje [...] une struture stabile e ricognossude, buine di lavorâ in mût sientific sui cambiaments che a integnin il lessic"

da "Relazion dal Grup di lavôr “Planificazion linguistiche”" di Donato Toffoli

"i lavin daûr atents [te visite aes oparis di art], fasintsi cualchi note, scambiant un cul altri judizis e opinions"

da "La Madalene" di Zuan Lurinçon

note s.f.
(no-te)

[TS] (scol.) Comunicazion di un docent che al rimarche un compuartament negatîf di un arlêf

esempi

"la mestre, stufe di lotâ cuintri di me [...] mi veve metude une note sul cuader"

da "Trê feminis" di Gianni Gregoricchio

note s.f.
(no-te)

Articul di gjornâl che al pant une posizion sore di un argoment

sinonimi

coment, scrit

esempi

"al è di un pieç che o scrîf e o publichi articui e notis par furlan, massime sul orghin politic dal Moviment Friûl"

da "Memoriis di politiche linguistiche" di Adrian Cescje

"une note di costum"

note s.f.
(no-te)

Comunicazion, ancje uficiâl, che e pant un parê su di un probleme

sinonimi

comunicât

esempi

"cualchi an indaûr une note dal ministeri de istruzion e veve marcât un probleme di fonde dal insegnament-aprendiment de lenghe taliane"

da "Rispietìn la marilenghe" di Gotart Mitri

note s.f.
(no-te)

Liste di ce che si à di paiâ o fâsi paiâ

sinonimi

cont

esempi

"o clami il camarîr. Mi presente la note pleade in doi"

da "Viaç a Vignesie" di Arturo Feruglio

"vô notais vulintîr, massime a cierts capos di famee… e note, e note, e sglonfe la note fin che rivais adore di mangjâi cualchi cjamput…"

da "A la oselade" di Pieri Somede dai Marcs

note s.f.
(no-te)

[FO] (mus.) Segn che al pant un sun inte scjale musicâl

sinonimi

note musicâl

esempi

"imparâ a lei lis notis dal pentagram"

note s.f.
(no-te)

Maniere particolâr di pandi o di pandisi, o ancje maniere di fâ stâ chei altris (fig.)

esempi

"di sigûr mi visi che la sô vôs e pandeve une note di delusion"

da "Trê feminis" di Gianni Gregoricchio

"o volarès sierâ cheste lezion cuntune note di otimisim"

da "Il risultât eletorâl dai partîts di identitât teritoriâl - A case study: Scottish National Party" di Sergio Cecotti

"la parone [de ostarie] lu viodeve simpri vulintîr par vie che al puartave une note legre"

da "Il dint" di Angelo Covazzi

monolingue