SuperDizionari

ordenari adi.
(or-de-na-ri)

Che al è tal ordin normâl des robis, che nol à caratars di specialitât o di ecezionalitât

sinonims

normâl, regolâr, usuâl, comun, corint, solit

esemplis

"la vite ordenarie de int, il so lavôr, lis sôs gjondis e i siei dolôrs, par solit, no interessin ae storie: la storie e je storie dai potents"

gjavât fûr di "Cuintristorie dal Friûl fin sot la Italie" di Josef Marchet

"salacor al jere par chê semplicitât che ju tratavin propit cussì puartâts in palme di man. "Nô, o sin come ducj, po: int ordenarie!" e diseve Dreine"

gjavât fûr di "La aghe da pît la cleve" di Dino Virgili

Viôt ancje: ordinari

ordenari adi.
(or-de-na-ri)

Che nol à grant valôr

sinonims

andant, comun, corint, di dozene, di trê braçs un franc, dozenâl, basot, di mieze lane, di mieze velade, di mieze vigogne, mediocri, modest

esemplis

"e met intor cualchi peçot furnît de parone, peçots di lavôr e robe ordenarie , ma che a judin di istès a sclarîi e ricreâi un fregul il voli"

gjavât fûr di "Storie di Vera" di Ivano Urli

ordenari adi., s.m.
(or-de-na-ri)

Che, cui che al à manieris pôc finis, che nol à creance ni elegance (fig.)

sinonims

grubian, volgâr, vilan, maleducât, malegraciôs, salvadi, coiar, gropolôs, triviâl, grês

esemplis

"«A son doi salvadis, plens di pretesis, maleducâts, ordenaris, come il pan di sorc» e diseve done Cheche"

gjavât fûr di "Il tesaur di done Cheche" di Pieri Menis

"la muse ordenarie [de prostitude], pastrocjade di ros sui lavris, no imprometeve dal sigûr nissune delizie"

gjavât fûr di "Îr e doman" di Gianni Gregoricchio

ordenari adi., s.m.
(or-de-na-ri)

Che, cui che al ten un incaric in maniere regolâr e definitive

esemplis

"professôr ordenari di leterature furlane te Universitât di Triest"

gjavât fûr di "Memoriis di politiche linguistiche" di Adrian Cescje

ordenari adi., s.m.
(or-de-na-ri)

[TS] (dir.can.) Predi che al à un podê di jurisdizion leât al incaric

ordenari s.m.
(or-de-na-ri)

Toc regolâr di ort o braide li che e je semenade une cierte sorte di plante

sinonims

strop, ordenâl

esemplis

"o lavi a ricreâmi il voli tai ordenaris dal ort dai miei vons"

gjavât fûr di "La strie" di Lucio Perès

ordenari s.m.
(or-de-na-ri)

[TS] (milit.) Cuantitât di bêçs destinade a frontâ lis spesis di ogni dì pal sostentament de trupe

esemplis

"il soldât [...] se i vegnin afidâts i bêçs del ordenari dei so cameradis nol devi sot pena di un ancjamò plui rigorôs cjastì, abusâsi nepûr de la minima part"

gjavât fûr di "Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera" di Antoni Brumat

monolengâl