SuperDizionari

passaç s.m.
(pa-ssaç)

Il passâ par un puest, un spazi, e v.i.

sinonimi

passâ, passade, transit

esempi

"lis primis monts che a blochin il passaç des massis di aiar umit che a vegnin dal Sud, a àn lis cuantitâts plui altis di ploie e di nêf"

da "Notis di meteorologjie pal Friûl - Vignesie Julie" di Stefano Micheletti, Marcellino Salvador

"al tierç passaç [cul avion], l'inglês al jere propit a ret des lûs e, finalmentri, i berlà al so compagn che al spietave cul sportel spalancât: "Okay!""

da "Il muc" di Roberto Ongaro

passaç s.m.
(pa-ssaç)

Puest, sît, lûc par li che si passe

sinonimi

pas, passadôr, passalizi, traghet, viertidure

esempi

"par jentrâ tal landri si veve di rimpinâsi sù par un passaç intrigât"

da "La regjine dal Landri" di Josef Cjargnel

"si scugnive passâ il bosc di Kebespok, une pinede fisse fisse, dulà che nancje di dì nol jentrave il soreli, e il passaç al jere cussì stret che no si stave in trê a pâr"

da "Tal bosc di Kebespok" di Pieri Menis

passaç s.m.
(pa-ssaç)

Toc di un test, di un discors, di un messaç e v.i.

esempi

"al è un altri passaç de sentence de Cort costituzionâl che al distrûç l'implant di tutele scolastiche che la leç regjonâl e à tentât"

da "Memoriis di politiche linguistiche" di Adrian Cescje

passaç s.m.
(pa-ssaç)

Il mudâ stât, cundizion e v.i.

sinonimi

cambiament, mudament

esempi

"il passaç dal ordin antîc a chel gnûf al puartarà, inte France dal XIV secul, a di une serie di rivoltis popolârs"

da "La invenzion dal stât" di Fabian Ros

"i benandants impen a vivevin lis lôr esperiencis estatichis aes Joibis des Cuatri Timporis, antighis datis paganis che a segnavin il passaç des stagjons"

da "Benandants e Terapeutis / Terapeutidis" di Sandri Carrozzo

passaç s.m.
(pa-ssaç)

Viaç curt fat a gratis tal veicul di un altri

sinonimi

tîr

esempi

""Doman - martars - o varès dibisugne di lâ a Codroip, copari Jacum", e al continuà, "Mi daressistu un passaç?" "

da "Avîs pal copari" di Angelo Covazzi

"par intant si jere ufiert di dâi un passaç cu la machine che al veve lassât tal parc dal aeropuart"

da "Un piçul particolâr" di Fabian Ros

passaç s.m.
(pa-ssaç)

[TS] (polit.) Leture, presentazion di mendis e votazion di un test intun orghin colegjâl

esempi

"une gnove conferme di cemût che «L'Italia è una e incorreggibile». E je chê che e rive dal passaç ae Cjamare dal gnûf dissen di leç dal Guvier in cont de riforme de Rai e dal servizi radiotelevisîf public"

da "Furlan in Rai. L’ordin dal dì e il disordin di ducj i dîs" di Marc Stolf

passaç s.m.
(pa-ssaç)

[TS] (cinem.) Ogni proiezion publiche di un cine

sinonimi

proiezion

passaç s.m.
(pa-ssaç)

[TS] (telev.) Comparizion intun program televisîf di bande di personaçs famôs

passaç s.m.
(pa-ssaç)

[TS] (sport) In cualchi zûc di scuadre, il dâ la bale a un compagn di scuadre

esempi

"a passin i minûts, il ritmi si manten bon ancje se la precision di passaçs e tîrs e va al mancul"

da "Cagliari – Udinese 1-1" di Marc Stolf

passaç s.m.
(pa-ssaç)

[TS] (mat.) Trasformazion di une formule intune ecuivalente

monolingue